Albistea entzun

Nafarroako suteek 10.000 hektareatik gora erre dituzte

Suteen egoerak hobera egin du, eta alerta maila jaitsi du gobernuak. Olleta, Makirriain, Santsoain eta Amatriaingo bizilagunak etxera itzuli ezinik daude
Txirrindulari bat suteek belztutako paisari begira, atzo.
Txirrindulari bat suteek belztutako paisari begira, atzo. ANDONI LUBAKI / FOKU Tamaina handiagoan ikusi

Oihane Puertas Ramirez -

2022ko ekainak 22

Nafarroan larunbatean piztutako suteek 10.000 hektareatik gora kiskali dituzte. Javier Remirez Nafarroako Gobernuko Lehendakaritza, Berdintasun, Funtzio Publiko eta Barne sailburu eta gobernuko lehendakariordeak atzo adierazi zuen «historikoa» izan dela suteek erretako eremua: «Soroak eta basoak hondatu ditu, baina, tamainagatik, batez ere basoak izan dira kaltetuenak». Remirezek esan zuen suteek eragindako kalteak oso handiak izan direla. Kalteei buruzko datu ofizialak gobernuko ingurumen teknikariek landuko duten txostenean jasoko dira, eta hori izan arte itxoiteko eskatu zuen lehendakariordeak.

Nolanahi ere, jakinarazi zuen azken orduetan egoerak «hobera» egin duela, eta, hori dela eta, gobernuak suteengatik ezarria duen alerta maila jaistea erabaki duela: bigarren alerta mailatik larrialdi aurreko alerta mailara. Remirezek azaldu zuen ezen, egoerak hobetzen jarraituz gero, bihartik aurrera alerta maila koska bat gehiago jaisteko moduan egongo direla.

Larrialdia arindu denez, hainbat herritako bizilagunek beren etxera itzultzeko aukera izan zuten atzo. Hala, Galipentzuberriko, Galipentzu Zaharreko, Eslabako eta Lergako bizilagunei etxera itzultzeko baimena eman zien Nafarroako Gobernuak. Ostera, Olleta, Makirriain, Santsoain eta Amatriain udalerrietako bizilagunak etxera itzuli ezinik daude oraindik ere. Guztira, 85 pertsona ebakuatu zituzten herri horietan.

Hala eta guztiz ere, Remirezek «zuhurtziaz» jokatzeko deia egin zien herritarrei. Adierazi zuen Erreniegako eta Galipentzuko suteen egoerak «hobetu» egin direla aurreko egunekoarekin eta bereziki asteburukoarekin konparatuta, baina Galipentzuko fokua oraindik «kezkagarria» dela. Haren arabera, egoera «aldakorra» izan daiteke, eta kontrolpean egon daitekeena bizpahiru ordutan alda daiteke. Nafarroa erdialdean martxan daude sua itzaltzeko baliabide guztiak, «muturreko sute arriskua» dela eta.

Remirezek azaldu zuen suteen bilakaera nolakoa den ikusteko eguraldiaren aldaketen zain daudela: «Prezipitazio ugariak ez ditugu datorren ostegunera arte espero».

Kongresura laguntza eske

Suteek Nafarroan sortutako kezka Espainiako Kongresura iritsiko da aste honetan, EH Bilduren eskutik, eta egoera hobetzeko laguntza eskatuko dute. Mertxe Aizpurua diputatuak atzo adierazi zuen laguntza ezinbestekoa dela horrelako larrialdi egoera baten aurrean. Horrekin, nabarmendu zuen kasu «askotan» diru laguntzak «denboran asko» luzatzen direla.

Besteak beste, Obanos, Muruzabal, Legarda eta Gares herriek kalteak jasan dituzte suteen ondorioz, eta herri horietako alkateek atzo eskatu zioten laguntza Nafarroako Gobernuari, kalteak konpondu ahal izateko. Hori horrela, Maria Txibite Nafarroako Gobernuko lehendakaria Obanosera joan zen atzo eguerdian, eta bertako alkate Arantxa Hernandezekin bildu zen, baita Oihan Mendo Gareskoarekin, Silvestre Belzunegi Legardakoarekin eta Alberto Azparren Muruzabalgoarekin ere.

Txibitek iragarri zuenez, Nafarroako Gobernuak eta Espainiakoak laguntzak banatuko dituzte kalteak erreparatu ahal izateko, eta leheneratze lanetan hasiko dira «lehenbailehen», betiere udalen laguntzarekin. Izan ere, lehendakariaren ustez, «ezinbestekoa» da kaltetutako herri bakoitzaren balorazioa egitea. Horrekin batera, azaldu zuen «oraingoz», nekazariak ezingo direla uzta lanekin hasi.

San Joan sua, bertan behera

Nafarroan piztutako suteak ez areagotzeko xedez, beste zenbait neurri iragarri dituzte, eta batzuek San Joan gauean pizten diren suekin dute zerikusia. Gobernuko lehendakariordearen arabera, suteak pizteko dagoen arriskua kontuan hartuta, «bateraezina» da San Joan suak egitea, eta debekatu daitezke: «Zuhurrak izan behar dugu jokabide arriskutsuekin». Era berean, Iruñeko Udaltzaingoak jakinarazi zuen Nafarroako hiriburuan ezingo dela surik egin: «Arrisku handiko egoeran gaude. Logikoena da surik ez egitea».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Sindikatu Medikoko kideak, atzo, greba hasi aurreko elkarretaratze batean. ©VILLAR LOPEZ / EFE

Ultimatuma eta greba hotsak

Ion Orzaiz

Sindikatu Medikoak ezezko borobila eman dio Nafarroako Gobernuaren eskaintzari, eta grebari eutsi dio. Eskaerak: soldata igoera handiagoa, esklusibotasuna eta gobernuaren solaskide bakarrak izatea

 ©JON URBE / FOKU

«Diktaduraren aurkako indarkeria kondenatu beharra ez dut ulertzen»

Xabier Martin

Frankismoak 1960tik 1975era Gipuzkoan eragindako biktimak identifikatzeko ikertzen aritu da. Uste du erakunde batzuk«deseroso» daudela ETA sortu zeneko aro historiko horri erreparatzean.
Presoak desfilatzen, 1960ko hamarkadan, Langraiz Okako espetxean (Araba); Alfer eta Gaizkileen Legearen arabera kartzelatu zituzten horietako asko. ©JAVIER GOMEZ

'Alferrak eta gaizkileak' izateagatik atxilotu zituztenak omentzeko erakusketa bat egin dute Gasteizen

Iraia Vieira Gil

'Alferrak eta gaizkileak' izateagatik atxilotu zituztenak omentzeko erakusketa bat egin du aldundiak Gasteizen. Orduan ahotsik izan ez zutenei lekua eman nahi izan diete gaur.

Mutilentzat bakarrik den Erain ikastetxea, Irunen (Gipuzkoa), artxiboko irudi batean. ©GORKA RUBIO / FOKU

Jaurlaritzak ituna eten egingo die sexuka bereizten duten eskolei

Edurne Begiristain

Hurrengo ikasturtetik aurrera kenduko zaie finantzaketa. Bildarratzek esan du «ahalik eta modu adostuenean» egin nahi dutela prozesua, eta ikastetxeekin harremanetan direla

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.