Albistea entzun

Foro Sozialak behatoki bat sortu du espetxe politikaren bilakaera aztertzeko xedez

Sei hilean behin txosten bat plazaratuko dute; lehena aurkeztu dute. Urrunen dauden presoekin «keinu bat» izateko eskatu diote Espainiako Gobernuari
Agus Hernan, Aitzol Asla eta Teresa Toda, atzo, Bilbon.
Agus Hernan, Aitzol Asla eta Teresa Toda, atzo, Bilbon. ARITZ LOIOLA / FOKU Tamaina handiagoan ikusi

Gotzon Hermosilla -

2020ko uztailak 1

Motibazio politikoko euskal presoei aplikatutako espetxe politikaren behatokia sortu du Foro Sozial Iraunkorrak, espetxe politikaren bilakaeraren «jarraipena» egiteko eta horri buruzko «informazio garden eta zuzena» emateko. Foro Sozialeko kide Agus Hernanek eta Teresa Todak esan dutenez, espero dute behatokia «tresna eraginkorra» izango dela espetxe politikaren aldaketa lortzeko lanean.

Behatokiak txostena argitaratuko du sei hilabetean behin, eta lehenengoa aurkeztu dute Bizkaiko Abokatuen Elkargoaren egoitzan egindako agerraldian. Presoen egoeraren inguruko datu eguneratuak emateaz gain, txostenean badago Etxerat elkarteak egindako azterketa bat COVID-19aren pandemiak espetxeetan izan duen eraginaz, eta Valentziako Unibertsitateko (Herrialde Katalanak) Zigor Zuzenbideko irakasle Javier Mira Benaventek analisi bat ere badakar, presoen gizarteratzeari buruzkoa.

«Espetxe politikaren aldaketaren aldeko partida irabazita dago euskal gizartean, alderdi politikoetan, sindikatuetan eta instituzioetan», esan du Teresa Todak. «Ez da horrela izan, ordea, praktikan partida hori jokatzen den eremuan, errealitaterik gordinena bizi den tokian; Espainiako Estatuan». Horretan ere eragin nahi du behatokiak, eta, horregatik, txostena igorriko die Espainiako instituzio eta eragile ugariri.

Izan ere, Todaren aburuz, «iraganeko logikekin jarraitzen duten alderdiek» segitzen dute espetxe politika berri bat ezartzearen kontrako jarrera sustatzen, eta horrek «eragotzi egiten dio Pedro Sanchezen gobernuari alor honetan urrats ausartagoak egitea».

Horregatik, Foro Sozialak pentsatzen du beharrezkoa dela Espainian ere «iritzi korronte demokratiko bat sortzea», eta horretarako «informazio egiaztatua eta datu zehatzak eta gardenak eskaintzeak» berebiziko garrantzia du. Helburu hori lortu nahi dute behatokiaren bidez.

Aitzol Asla abokatu eta Bizkaiko Abokatuen Elkargoko dekanatuko kideak azaldu ditu behatokiaren txostenek izango dituzten ezaugarriak: «Espetxeei buruzko datu eguneratuak eta presoen egoerari buruzko informazio zehatza emango ditu».

Halaber, behatokiak informazioa emango du alderdi juridikoaren garapenari buruz, eta «jazo daitezkeen gertakari garrantzitsu eta larrien jarraipena ere egingo du, bai eta horien inguruan egin diren urratsena ere», azaldu du Aslak.

Argi-ilunez beteriko egoera

Agus Hernanek aztertu du espetxe politikak azken hilabeteetan izan duen bilakaera, eta esan du «argi-ilunak» daudela egoeran. Oraindik preso gehienak Euskal Herritik urrunen dauden espetxeetan daude, eta lehenengo gradua ezartzen diete. Bestalde, graduen progresioan aurrera egin da azken hilabeteetan, baina urrats horiek oraindik ere «apalak» dira.

Hernanen arabera, pandemiaren kontra hartutako neurriek «sakondu» egin dute presoak gerturatzeko beharrari buruzko eztabaidan, preso asko bisitarik gabe utzi dituelako eta arazoa agerian laga duelako. Horregatik, «keinu bat» eskatu die Espainiako Gobernuari: Galizian, Herrialde Katalanetan, Andaluzian eta Murtzian (Espainia) dauden presoak berehala Euskal Herrira gerturatzea.

Hernanen aburuz, keinu horrek euskal gizartearen gehiengoaren borondateari erantzungo lioke, eta, gainera, orain arte egindako urrats «apalek» presoen senideengan eragin duten «frustrazioa» arintzeko ere balioko luke: «Ez dugu ahaztu behar presoen auzia konpontzeak eragin positiboa duela bizikidetza demokratikoan».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Iñaki Subijana EAEko Justizia Auzitegi Nagusiko presidentea, 2013ko argazki batean. ©JON URBE / FOKU
Iñaki Subijana, EAEko Justizia Auzitegi Nagusiko presidentea, 2013an egindako argazki batean. ©JON URBE / FOKU

Subijana progresista aukeratu dute EAEko Auzitegi Nagusiko presidente

Igor Susaeta Jon Ordoñez Garmendia

Espainiako Botere Judizialaren Kontseilu Nagusian hautatu dute, bigarren bozketan. Gipuzkoako Probintzia Auzitegiko burua izan da azkeneko hamar urteotan. Juan Luis Ibarra ordezkatuko du
Tentacles estudioko kideek atzo egin zuten prentsaurrekoan aurkeztu zuten diseinu berria. ©ENDIKA PORTILLO / FOKU

Adierazpen askatasunaren aldeko kanpaina bat hasiko dute sarean

Jone Arruabarrena

'All Pitufos Are Bastards' mezua daraman diseinuaren egileek adierazi dute otsailaren 23ko gertaeretan Udaltzaingoaren gehiegikeria salatzeko sortu zutela afixa

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Gotzon Hermosilla

Informazio osagarria