Albistea entzun

Hegoaldean, pentsioak batez beste 32 euro handituko dira urtarrilean

Aurtengo batez besteko inflazioaren arabera eguneratuko ditu Espainiako Gobernuak. Aurten prezioak uste baino gehiago handitu direnez, aparteko ordainketa bat jasoko dute pentsiodunek

Iker Aranburu -

2021eko azaroak 30

Hego Euskal Herriko pentsiodunek dagoeneko kalkula dezakete datorren urtean zenbateko pentsioa jasoko duten: aurtengo kopuruari %2,5 gehiago beharko diote. Horrek esan nahi du Hegoaldeko batez besteko pentsioa 32 euro handituko dela urtarrilaren 1ean, eta 1.300 eurora iritsiko dela —1.268 euro direla dio azken datuak, urrikoak—.

%2,5eko datua ez da ausazkoa, baizik eta Espainian 2020ko abendutik 2021eko azaro artean izan den batez besteko inflazioari dagokio. Behin-behineko datua da, eta abenduaren 15ean izango da behin betikoa, egun horretara arte ez baitu INEk baieztatuko atzo aurreratutako azaroko datua, %5,6koa. Edonola ere, hamarren baten gorabeherak ez du alderik eragingo.

Pentsioak aurreko urteko inflazioaren araberako eguneratzea ezartzen duen legea 2022ko urtarrilaren 1ean jarriko da indarrean, baldin eta aste honetan Espainiako Kongresuaren oniritzia jasotzen badu. Sistema horrek ordezkatu egingo du PPren gobernuak indarrean jarritakoa. Hark Gizarte Segurantzaren kontuen osasunarekin lotzen zuen pentsioen eguneratzea, eta, defizita zutenez, 2014-2018 epean pentsioak %0,25 handitzea ekarri zuen. Sistema hori bertan behera geratu zen Pedro Sanchez Espainiako gobernuburu izendatu zutenean.

Urtarrileko 'saria'

Pentsioak batez besteko inflazioaren arabera eguneratzeak moteldu egiten du inflazioan batzuetan gertatzen diren gorabeheren eragina. Aurten, oso handia izan da gorabehera, urtea ozta-ozta hasi zuelako inflazio positiboarekin —2020an, prezioak jaitsi egin ziren, pandemiaren ondorioz—, baina gero energiaren garestitzeak azken urteotako igoerarik handiena ekarri du.

Horrenbestez, %2,5eko igoera oso urrun geratu da azaroko datutik (3,1 puntu gutxiago). 2022an, aurreikuspenak betez gero, oso litekeena da kontrakoa gertatzea, eta inflazio handiagoa izatea urtearen hasieran eta txikiagoa urteak aurrera egin ahala; hori baieztatuko balitz, eta aurten gertatuko denaren kontra, azaroko inflazioa baino handiagoa izango da 2023an pentsioek izango duten gorakada.

PPren erreformak baliogabetu egin zuen urtarrilean pentsiodunek aparteko ordainketa bat jasotzeko aukera. 1985ean ezarri zen, bermatzeko pentsiodunek ez zutela erosteko ahalmena galduko. Haren bidez, azaroko inflazioa aurreko urtarrilean egindako igoera baino handiagoa bazen, urtarrilean aldea konpentsatzen zuen Gizarte Segurantzak.

Sistema hori behin betiko lurperatuko du erreforma berriak, baina aurretik, azken aldi batez, aparteko ordainketa jasoko dute Hego Euskal Herriko pentsiodunek. Izan ere, azaroko batez besteko inflazioa 1,6 puntu handiagoa izan da joan den urtarrilean jasotako pentsioen igoera baino (%0,9). Kopuru osoetan, batez besteko pentsioa eskuratzen duenak —1.268 euro— 284 euroko ordainketa bat jasoko du aste gutxi barru.

2018an jaso zuten azken aldiz ordainketa hori. 2019an eta iaz ez zuten euro bakar bat ere jaso, pentsioen igoera handiagoa izan zelako azken inflazioa baino eta, horrenbestez, erosteko ahalmena irabazi zutelako pentsiodunek.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Citiz auto-partekatu kooeratiben sareko auto batzuk. ©Citiz

Auto-partekatu kooperatiba sortuko dute Ipar Euskal Herrian

Iñaki Etxeleku - Iparraldeko Hitza

Nork bere autoa utzi kooperatibako autoak partekatzeko egitasmoa bidean jarri dute lau lapurtarrek. Elkartea udaberrian sortu eta lehen autoak 2023ko martxan nahi dituzte.

Abeltzainen protesta, Bilboko Arriagan. ©Monika del Valle / Foku

Elikagai katearen legea «berehala» aplika dadila eskatu dute nekazariek

Imanol Magro Eizmendi

Prezioen behatokia eta antzeko kontrol tresnak garatzeko galdegin diete euskal administrazioei, Bilbon. Gastuek goraka jarraitzen dutela salatu dute

Turistak Donostiako Parte Zaharrean, udan. ©JUAN HERRERO / EFE

Turismoak oso urruti ditu oraindik pandemia aurreko datuak

Xabier Martin

2021. urteak datu hobeak utzi ditu pandemiaren gordina pilatu zuen urteak baino, 2020ak baino, baina, turista kopuruei dagokienez, heren bat baino gehiago galdu dute Arabak, Bizkaiak eta Gipuzkoak 2019arekin alderatuta.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.