«Lasaitasuna berrezartzeko» eskatu die Blinkenek Israeli eta Palestinari

Antony Blinken AEB Ameriketako Estatu Batuetako Estatu idazkaria Benjamin Netanyahu Israelgo lehen ministroarekin elkartu zen atzo Tel Aviven, Israelen eta Palestinaren tentsioa areagotzen ari den honetan —Israelgo indarrek gutxienez 35 palestinar hil dituzte urtea hasi zenetik—. «Lasaitasuna berrezartzeko eta tentsioa arintzeko berehalako neurriak» eskatu zizkien Blinkenek gatazkako «alde guztiei»; besteak beste, Israelgo Gobernuari eta Palestinari.

AEBetako Estatu idazkariak Netanyahuri adierazi zion AEBetako Gobernuak «Israelgo segurtasunarekin» daukan konpromisoa «hautsezina» dela. Gaineratu zuen Israelen eta Palestinaren arteko gatazka konpontzeko baldintzak ezarri behar direla, «Palestinarrek eta israeldarrek baldintza berak izan ditzaten askatasuna, segurtasuna, aukerak, justizia eta duintasuna izateko». Blinken gaur da biltzekoa PAN Palestinako Aginte Nazionaleko presidente Mahmud Abbasekin.

Bileraren osteko prentsaurrekoan, Israelgo lehen ministroak ez zuen indarkeriaren handitzearen inguruko aipamenik egin, baina nabarmendu zuen Israelek Arabiar Emirerri Batuekin, Marokorekin, eta Bahrainekin harreman diplomatikoak normaldu izanak «mesede» egingo diola Palestinako gatazkaren irtenbideari.

Israelen eta Palestinaren arteko gatazka gori dago, baina. Atzo bertan, Israelgo militarrek palestinar bat hil zuten tiroz, Zisjordania okupatuko Hebron hirian, Palestinako Osasun Ministerioak jakinarazi zuenez.

Tentsioak ostegunean egin zuen eztanda. Israelgo indarrek bederatzi palestinar hil zituzten Zisjordania okupatuko errefuxiatuen kanpamentu batean, Jenin hirian. Hilketa horiek salatzeko egindako protestetan liskarrak sortu, eta beste palestinar bat hil zuten Israelgo armadako soldaduek.

Ostiralean, pertsona batek gutxienez zazpi lagun hil zituen, tiroz, Jerusalem ekialde okupatuko sinagoga bati egindako erasoan. Israelgo Poliziak berehala hil zuen ustezko erasotzailea, tiro eginda. Hamas Palestinako organizazio politiko islamistak goratu egin zuen sinagogaren aurka egindako ekintza hainbat meskitatako bozgorailuetatik, erasoa bere gain hartu gabe. Hamaseko bozeramaile Hazem Qassemek adierazi zuen Israelek Palestinako «okupazioan eragindako krimenen aurkako erantzuna» izan zela eraso hori. Egun berean, Gazatik zenbait suziri jaurti zituzten Israelgo lurraldera. Armadak Hamasi egotzi zion erasoaren erantzukizuna —hark du Gazaren kontrola—. Suziri jaurtiketaren ostean, Israelgo armadak Gaza bonbardatu zuen.

Larunbatean, bi israeldar larri zauritu zituzten tiroketa batean, Jerusalem ekialdean. Israelgo Poliziaren arabera, 13 urteko palestinar bat izan zen erasotzailea, eta hura «neutralizatu eta zauritu» egin zuten.

Deportazioak

Yoav Gallant Israelgo Gobernuko Defentsa ministroak atzo ohartarazi zuen «irmoki» jardungo dutela Israelgo herritarrak «mehatxatzen» dituztenen aurka: «Terroristek auzitegietan edo hilerrian amaituko dute». Gallantek nabarmendu zuen armadak «eraso ekintzak» egingo dituela, eta «terroristei laguntzen dietenek» sufrituko dutela. «Beharrezkoa bada, haien etxeak eraitsiko ditugu. Eskubideak kenduko dizkiegu. Beharrezkoa bada, kanporatuko ditugu», esan zuen Defentsa ministroak. Netanyahuk esandakoarekin bat egin zuen Gallantek. Izan ere, Israelgo lehen ministroak larunbat gauean adierazi zuen bere gobernuak erantzun «gogorra, azkarra eta zehatza» emango duela, eta plan bat egitekoa dela «terroristen» senideei Israelgo herritartasuna eta herrialdean bizitzeko baimena kentzeko, eta PANen kontrolpeko lurraldera deportatzeko; Zisjordania okupatura, hain zuzen.

Gainera, Itamar Ben Gvir Israelgo Segurtasun Nazionaleko ministroak «terrorismoagatik» zigortutakoei heriotza zigorra ezartzearen alde egin zuen atzo. «Hiltzen duen edonor aulki elektrikora bidali behar da», adierazi zuen. Gaineratu zuen Zisjordania okupatuko zazpi kolonia legeztatzeko asmoa duela.

Mohamad Xtayeh Palestinako lehen ministroak adierazi zuen Israelgo Gobernuak proposatutako neurri horiek urratu egingo dituztela Genevako Konbentzioak. Akordio horiek nazioarteko zuzenbide humanitarioa arautzen dute, eta gatazka armatuetako biktimak babestea dute helburu. «Erabaki horiek erakusten dute zein sakona den okupazioko gobernuaren barruko krisia, eta atentzioa desbideratu nahi dute hilketak eginez, errepresioa baliatuz, zigor kolektiboak ezarriz, etxeak eraitsiz eta kolono terroristei bidea irekiz, palestinarren aurka krimen gehiago egin ditzaten», adierazi zuen Palestinako lehen ministroak.

Lur okupatuetako indarkeria handitzen ari da iaztik. Aurten, gutxienez 35 palestinar hil dituzte Israelgo indarrek. Iaz, 170 palestinar hil zituzten lur okupatuetan; horietako batzuk milizianoak ziren, baina beste asko ez. Iazkoa da 2006an Bigarren Intifada amaitu zenetik izandako urterik odoltsuena.