Siemens Gamesak dozenaka langile kaleratuko ditu Zamudion eta Sarrigurenen

Zehazki zenbat diren egun gutxiren buruan jakingo da, baina gauza bat argi dago: Euskal Herrian eragin handia izango dute Siemens Gamesak iragarritako kaleratzeek. Multinazional eolikoak seiehun langile botako dituela iragarri du, kostuak jaisteko eta enpresaren errentagarritasuna handitzeko, haize erroten prezioa apal dabilen honetan. Kaleratzeak bulegoko lanetan gertatuko dira, eta horretatik asko dauka Siemens Gamesak Euskal Herrian: Zamudion (Bizkaia) du egoitza nagusia, eta handik eta Sarrigurendik (Eguesibar, Nafarroa) gidatzen dute onshore negozioa, lurreko haize errotena. Euskal Herriko zentroen eta Madrilen artean 109 kaleratze izango direla azaldu diete sindikatuek berri agentziei.

Langileek informazio zehatzagorik ez dutela azaldu dio Puy Remirez ELAko ordezkariak BERRIAri. Oso haserre azaldu da enpresarekin. «Zuekin batera [kaze- tariekin] jakin dugu kaleratzeena. Langileei eta haien ordezkariei egindako mespretxu sekulakoa da». Formekin ez da harrituta azaldu, baina bai, ordea, mamiarekin. «Harritzen gaituzte kaleratzeek. Sarrigurenen, behinik behin, lan karga ikaragarriak dituzte; langileak lanez gainezka daude, eta estres arazoak dituzte». Azken berregituraketan gertatutakoa gogoratu du: Zamudion, Sarrigurenen eta beste bulego txikiagoetan 142 lagunek onartu zuten enpresa uzteko eskaintza, «eta handik gutxira jende gehiago hartu behar izan zuten; soldata txikiagoekin, noski».

Marcus Tacke kontseilari ordezkariak atzo Madrilen azaldu zuenez, berehala hasi nahi dituzte negoziazioak sindikatuekin. «Helburua da errentagarritasuna handitzea, epe luzerako hazkunde errentagarria eta lidergoa ziurtatzeko». Lantaldea «neurri bigunen bidez» murrizten saiatuko dira, hau da, erretiro aurreratuen bidez, langile batzuk beste postu batzuetan jarriz, eta diruz lagundutako kaleratzeak eginez.

Kaleratzeak izango dira Alemanian (99), Erresuma Batuan (11), baita Italian, AEBetan, Polonian, Indian, Txinan eta Belgikan ere. Kaleratze gehien Danimarkan izango da, 201 langile kendu nahi baititu hango bulegoetatik. Irailean, herrialde horretan beste 600 kaleratze egingo zituela iragarri zituen Siemens Gamesak, baina oraingo «doikuntzak» ez du zerikusirik ordukoarekin, orain ez baitute txikituko ekoizpen gaitasuna.

Horregatik, Tackek argitu zuen kaleratzerik ez dela izango Euskal Herriko ekoizpen plantetan: Agoitzen (Nafarroa), Asteasun (Gipuzkoa) eta Mungian (Bizkaia). Duela bi aste, beren lanpostuekiko kezka azaldu zuten Agoitzen (250 langile), haiek bezala haize errotetarako palak egiten dituen beste lantegi bat erosi diolako Siemens Gamesak Senvion lehiakideari, Vagosen (Portugal).

Fabrika hori «Asiako hornitzaileekiko menpekotasuna txikitzeko» izango dela berretsi du Tackek, ez diola Agoizkoari lehiarik egingo. Baina argi esan zuen Agoizko eta As Somozasko (Galizia) lantegiak Espainiako merkatuaren eskaria betetzeko direla. Hau da, eskaririk ez badago, arriskuan leudekeela.

Tackek espero du Espainian «aurki» gobernua osatzea, eta energia eolikoari bultzada ematea. Euskal Herrian ere izan daitezke berritasunak arlo horretan. Jaurlaritzak bi urte barru jarri nahi du martxan parke eoliko bat, eta Iberdrola du bazkide, Siemens Gamesaren akziodunetan bigarrena (%8). Anbizio handiagoa du Nafarroako Gobernuak: uneotan beste 650 MW gehitzeko hamasei proiektu daude bidean. Gainera, Nafarroako parke gehienek hogei urte bete dituzte, eta haize errota handiagoak jartzeko unea iristen ari zaiela onartu du Iruñeak.

Tackek ziurtatu du Siemens Gamesa enpresa «independentea» izango dela aurrerantzean ere, nahiz eta 2020ko apirilean akziodun nagusiak —Siemens, akzioen %59ekin— Siemens Energy adarrean bilduko dituen energiarekin dituen interes guztiak. Egoitzak Zamudion segituko du, baina han gero eta pisu handiagoa dute zuzendari alemaniarrek, Gamesatik iritsitakoen kaltetan.