«Atzera begiratu, aurrera jarraitzeko», hori izango da aurtengo Memoriaren Egunaren goiburua, eta batez ere gazteak hartuko ditu aintzat, «haiek direlako etorkizuna». Eusko Jaurlaritzako Berdintasun, Justizia eta Gizarte Politiketako sailburu Beatriz Artolazabalek azaldu duenez, iragana, oraina eta etorkizuna «kate bereko katebegiak» dira, eta beharrezkoa da iraganari «begirada berri, kritiko, ausart eta etikoaz» so egitea «Euskadi justuago eta kohesionatuago bat» lortzeko.
Artolazabalek esan duenez, gakoa ez da besterik gabe «orria pasatzea», eta beharrezkoa da atzera begiratzea iraganetik ikasteko eta «zauriak ondo ixteko». Haren irudiko, gertatutakoaren inguruko analisiak askotarikoak izan daitezke, baina gizarteak gauza izan beharko luke ados jartzeko «indarkeriaren zentzugabekeriaren deslegitimazioan eta giza eskubideen urraketen gaitzespenean». «Ez dago giza duintasunaren gainetik dagoen kausa politikorik edo estatu arrazoirik», esan du.
Gogora institutuko zuzendari Aintzane Ezenarrok esan duenez, pandemiak sortutako egoera dela eta, aurten Memoriaren Egunean ez dute elkarretaratzerik sustatuko, nahiz eta zenbait herritan udalek horrelakoak antolatuko dituzten, eta, batez ere, zenbait material jarriko dute udalen eta ikastetxeen esku.
Gainera, azaroaren 10ean ekitaldi bat egingo dute Gogoraren Bilboko egoitzan, 17:00etan. Iñigo Urkullu lehendakaria han egongo dela iragarri dute.
Aurrera egiteko «atzera begiratzea» proposatuko dute Memoria Egunean
Batez ere, gazteak hartuko dituzte aintzat. Herrietan ez dute sustatuko elkarretaratzerik, baina azaroaren 10ean ekitaldi bat egingo dute Bilbon
Iruzkinak
Ez dago iruzkinik
Ordenatu
