Bruselak ohartarazi dio Ukrainari EBko kide izateko bidea luzea dela

Ukrainak uste du bi urteko epean EB Europako Batasuneko kide bihurtzeko moduan egongo dela. Hala adierazi zuen Denis Xmihal lehen ministroak, joan den astean, elkarrizketa batean, eta gauza bera egin zuen Der Spiegel aldizkarian, atzo, Ursula von der Leyen Europako Batzordeko presidenteak Kievera bisita ofizial bat egiten ari denean, hain justu. Eta Bruselak ez dio Ukrainari aterik ixten, inondik ere, baina ohartarazi dio talde komunitarioan sartzeko bidea luzea dela. «Prozesua ez da esprint bat, maratoi bat baizik», azaldu zuen, atzo, Johannes Hahn Europako Batzordeko Aurrekontu komisarioak. Von der Leyenek, Charles Michel Europar Kontseiluko presidenteak eta Volodimir Zelenski Ukrainakoak goi bilera bat egingo dute gaur, Kieven.

Dena den, Europako Batzordeak ez ditu Ukrainaren espektatibak zapuztu nahi, eta, horregatik, Hahnek azpimarratu zuen, batetik, Ukrainaren «patua» Europa dela; eta, bestetik, klubeko kide bihurtzeko hautagaiei eskatzen zaizkien erreformek abiada hartu dutela. Europako Parlamentuan egin zituen adierazpen horiek, eta, hain justu, ganbera horrek atzo ebazpen bat onartu zuen eskatuz EBri hauspotu dezala negoziazioen hasiera, eta babestu dezala bide orri bat zeinak zirriborratuko dituen Ukrainak estatu kide bihurtzeko eman beharreko pausoak. Talde komunitarioko kideek EBn sartzeko hautagai estatusa eman zioten Ukrainari, joan den ekainean.

Xmihalen arabera, 2024aren amaierarako egon nahi dute, «formalki», EBko kide bihurtzeko prest. «Erabakia ez dago gure esku, baina gure esku dagoena egiteko prest gaude horretarako». Ukrainako lehen ministroak nabarmendu zuen, bide batez, ustelkeriaren kontra egiteko konpromisoa hartu dutela. Aintzat hartu behar da dozena bat pasa goi kargudun kargugabetu zituela Zelenskik lehengo astean, ustelkeria hauspotzea argudiatuta.

Ustelkeriari aurre egiteko neurriak hartzea da EBk hautagaiei ezartzen dizkien baldintzetako bat. Gainera, egonkortasun politikoa bultzatu behar dute, instituzioek zuzenbide estatua bermatu behar dute, eta, beste eginkizun batzuen artean, giza eskubideak errespetatu behar dituzte.

Ikusteko dago Ukrainak zein bide egingo duen arlo horretan, baina EBko kide bihurtu zen azken estatua, Kroazia, 2013an sartu zen, eskaera formala egin zuenetik hamar urtera. Beste kasu bat: Poloniak hamar urte behar izan zituen kide bihurtzeko. 2004tik dago batasunean.

Von der Leyenek ere adierazi zuen, atzo, Kievek aurrera egingo duela «bide europarrean», eta gatazkarekin berarekin lotuta iragarri zuen Ukrainako gerrako krimenak epaitzeko zentro bat sortuko dutela Hagan (Herbehereak). Zelenskik eskatu zion Von der Leyeni Errusiari zigor ekonomiko gehiago jartzeko, indarrean daudenen eraginak «behera» egin duela iritzita. Bitartean, Europar Kontseiluak atzo beste 500 milioi euroko diru sail bat onartu zuen, Ukrainari emandako laguntza militarra finantzatzeko.