Pedro Asua milizianoaren gorpuzkiak berreskuratu dituzte

Galdakaoko miliziano baten gorpuzkiak lurpetik atera zituzten atzo, Jakako (Espainia) hilerriko hobi batetik. Dokumentazio historikoa baliatuz aurkitu eta berreskuratu dituzte Pedro Asua Zubiaurren gorpuzkiak. Izquierda Republicanari atxikitako Zabalbide batailoiko milizianoa izan zen gerra garaian Asua, eta 1938ko otsailaren 7an fusilatu zuten, Jakan, Gerra Kontseilu batek heriotza zigorra ezarri ondoren.

Galdakaoko alkate Iñigo Hernando, Gogora Memoriaren, Bizikidetzaren eta Giza Eskubideen Institutuko ordezkariak eta Jakako udalbatzako kideak hilerrira bertaratu ziren Aranzadiren lanen jarraipena egiteko. Gorpuzkiak aurkitu eta lurpetik ateratzeko lanak Eusko Jaurlaritzaren eta Aranzadi Zientzia Elkartearen arteko hitzarmenaren esparruan egiten dira, biktimaren familiaren eta Galdakaoko Udalaren ekimenez.

Udalak, Asuaren familiak eskatuta, Ander Aperribai historialariaren zerbitzuak kontratatu zituen haren heriotzaren nondik norakoak ikertzeko, eta horri esker jakin dute non lurperatu zuten, eta, ondorioz, haren gorpuzkiak berreskuratu dituzte. Udalak esan du Galdakao Gogora talde momorialistaren laguntza izan duela milizianoa aurkitzeko egindako bide osoan zehar. Iaz, urriaren 13an eta 14an, Aranzadik aldez aurreko prospekzio lanak egin zituen tokian bertan, eta, azkenerako, lurpetik ateratzea ahalbidetu dute.

Gorpuzkiak Pedro Asuarenak direla baieztatu dute, eta, beraz, Aranzadik Asuaren familiaren esku utziko ditu. Galdakaoko Elexaldeko hilerriaren ondoan martxoaren 19ko eguerdian egingo den ekitaldi publiko batean izango da hori.

Heriotza zigorra

Pedro Asua Zubiaurre (Galdakao, 1916 - Jaka, 1938) Izquierda Republicanari atxikitako Zabalbide batailoiko milizianoa izan zen. Atxilotu zutenean, Langileen Batailoietan lan behartuak egitera derrigortu zuten, lehenik Asturiasen eta, ondoren, Jakan. Haren zoriak txarrera egin zuen, ordea, modu dramatikoan. Salaketa batzuen ondorioz, Gerra Kontseilu batek epaitu eta heriotza zigorra ezarri zion, eta Jakan fusilatu zuten, 1938ko otsailaren 7an.

Jakako hilerriko hobi batean fusilatu eta hainbat pertsona lurperatu izanaren inguruabarrak jasotzen ditu Esteban C. Gomezen El eco de las descargas. Adiós a la esperanza republicana liburuak (Tiroen oihartzuna. Agur esperantza errepublikanoari).

Elexaldeko (Galdakao) Aldatze baserrian jaio zen Asua. Gerra piztu zenean, 20 urte zituela, postari lanpostu bat lortzeko ikasten ari zen. Milizianoa eta haren bi arreba txikiak umezurtzak ziren.