Albistea entzun

Gerra Ukrainan

Mobilizaziorako deia egin du Putinek, eta mehatxu nuklearra hauspotu

Errusiako presidenteak 300.000 erreserbista mobilizatzeko agindu du, «aberria babesteko». Zelenskik uste du Kremlinek ez dituela arma nuklearrak erabiliko. NATOk «zuhurtzia falta» egotzi dio Putini
Errusiako Polizia Putinen deiaren kontra protesta egitera atera zen pertsona bat atxilotzen, atzo, Moskun.
Errusiako Polizia Putinen deiaren kontra protesta egitera atera zen pertsona bat atxilotzen, atzo, Moskun. EFE Tamaina handiagoan ikusi

Igor Susaeta -

2022ko irailak 22

Vladimir Putin Errusiako presidenteak 300.000 erreserbista mobilizatzeko agindu du, eta Kremlinen menpeko Ukrainako lurralde batzuek erreferendum bidez Errusiaren parte bilakatzeko duten asmoa babestu du. Aldi berean, ohartarazi dio Mendebaldeari arma nuklearrak erabiltzeko prest legokeela bere herrialdea defendatzearren. «Ditugun baliabide guztiak erabiliko ditugu. Ez gara ahoberokerian ari», nabarmendu zuen atzo, iragarpenaren berri emateko agerraldian. Eta mobilizatzeko deia egin du, hain zuzen, Ukrainak aste batzuk daramatzanean herrialdearen ipar-ekialdean eta hegoaldean Errusiako indarrei kontraeraso egiten. Ukrainak eta Mendebaldeak Kremlinen hautuaren eta jarreraren kontra egin dute.

Euskal Herrian 08:00ak zirenean hitz egin zuen, telebista bidez, hamalau minutuko diskurtso batean. Aurten egindako molde bereko bigarren agerraldia izan zen, otsailaren 24koaren ostean. Orduan iragarri zuen Errusiak «operazio militar berezia» hasiko zuela Ukrainan. «Mobilizazio partzialera» deitu du arrazoi hauengatik: «Aberria babesteko, bere burujabetza eta lurralde osotasuna, eta gure herritarren segurtasuna». Sergei Xoigu Defentsa ministroak zehaztu zuen «inolaz ere» ez dituztela deituko ikasleak edo beste herritarrak, baizik eta lehen ere armadako kide izandakoak bakarrik. Xoiguren arabera, 25 milioi errusiarrek dute esperientzia militarra, eta horiek mobilizatzera dei ditzakete.

Vesna oposizioko mugimenduak mobilizazioaren aurka deitutako protestetan mila lagunetik gora atxilotu zituzten atzo, OVD-Info gobernuz kanpoko erakundearen arabera.

Volodimir Zelenski Ukrainako presidentea NBE Nazio Batuen Erakundearen Batzar Nagusian hitz egin gabe zegoen edizio hau ixtean, baina Alemaniako Bild telebista katean egin zioten elkarrizketa batean nabarmendu zuen ez duela uste Putinek arma nuklearrak erabiliko dituenik. «Ez dut uste munduak utziko dionik». Kremlineko buruari egotzi zion Ukraina «odoletan ito nahi izatea; are, bere soldaduen odolean». Gaineratu zuen bake elkarrizketak onartuko dituela «soilik» Putinek agintzen duenean Errusiako indarrak Ukrainatik ateratzeko. Mikhailo Podolyak Zelenskiren aholkulariak idatzi zuen Twitterreko bere kontuan Errusiak emandako pausoa «aurreikus» zitekeela, «gerra ez baita haiek planeatu bezala garatzen ari».

Jens Stoltenberg NATO Ipar Atlantikoko Itunaren Erakundearen idazkari nagusiak Errusiako presidentea kritikatu zuen, gerra erretorika «arriskutsua eta zuhurtziarik gabekoa» erabiltzen ari dela aurpegiratuta.

Elkarrizketarako deia egin zuen Txinak, eta Wang Wenbin Atzerri Ministerioko aholkulariak nabarmendu zuen «irtenbide bakezale bat» helburu duen edozein ahalegin babestuko duela. Eskatu zuen herrialde guztien «lurralde batasuna» errespetatzeko, Ukrainarena barne, baina baita, Errusia zuzenean aipatu gabe, herrialde guztien «kezka zilegiei» erreparatzeko ere. Gainera, Errusiari ezarritako zigor ekonomikoak kritikatu zituen.

AEBen iritziz, «ahulezia zantzuak» erakusten ari da Mosku, bai Luhansken, Donetsken, Zaporizhian eta Khersonen Errusiarekin bat egiteko erreferendumak «antolatzeagatik», bai mobilizaziorako deiarengatik. Hori adierazi zuen AEBek Ukrainan duten enbaxadore Bridget Brinkek. Etxe Zuriko maizter Joe Bidenek NBEren Batzar Nagusian esan zuenez, Ukrainaren «existitzeko eskubidea» ukatu nahi du Putinek. Bruselaren iritziz, «desesperatuta» dago Putin, eta horregatik hartu du erabaki hori. «Ez zaio bakea interesatzen», esan zuen atzo Peter Stano Europako Batzordearen Atzerri bozeramaileak.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Jende andana Eskoziako trans legearen proiektuaren aldeko protestan, joan den astean, Londresen. ©ANDY RAIN / EFE

«Blokeoaren atzean asmo politikoak daude»

Maddi Iztueta Olano

Erresuma Batuko Gobernuak trans legea blokeatzeak hautsak harrotu ditu Eskozian. Florence Oulds ekintzailearen arabera, prozesu demokratiko bat eten dute. Uste du trans komunitatea ez ezik beste herritarrak ere «oso haserre eta minduta» daudela.

Israelgo larrialdi zerbitzuetako langileak eta Polizia, atzo, erasoa gertatu zen lekuan, Jerusalem ekialdeko sinagoga batetik gertu. ©ATEF SAFADI / EFE

Pertsona batek gutxienez zazpi lagun hil ditu Jerusalemgo sinagoga batean

Mikel O. Iribar Mikel Elkoroberezibar Beloki

Israelgo armadak ustezko egilea hil du, eta erasoa «terroristatzat» jo. Hamasek ekintza goratu du, bere gain hartu gabe. Palestinak bost suziri jaurti ditu Gazatik Israelera, eta Israelek Gaza bonbardatu du

Tyro Nichols, Poliziak hil aurretik, bart zabaldu den bideoaren irudi batean. / ©Memphisko Udala

Memphisko bost poliziak afro-amerikar bat hil arte jipoitu dute eta protestan atera da jendea berriro kalera

Jon Ordoñez Garmendia

Memphisko bost poliziak urtarrilaren 10ean hil zuten Tyre Nichols, eta bart zabaldu dituzte jipoiaren irudiak.

Ehorzketa etxe bateko bi langile droga trafikatzailea zelakoan hil zuten pertsona baten gorpua eramaten, Manilan, 2021eko irailean ©ROLEX DELA PENA / EFE

NZAk berriz ireki du Filipinetako drogaren kontrako gerrari buruzko ikerketa

Ander Perez Zala

Auzitegiak fiskaltzaren eskaria onartu du, argudiatuta Manilak harturiko erabakiak ez direla nahikoa izan. Duterteren agintaldian 30.000 lagun hil zituzten, giza eskubideen aldeko erakundeen arabera.

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.