Wagnerreko buruzagiak iragarri du hasi direla Bakhmutetik ateratzen

Bakhmut hartu dutela adierazi eta egun batzuk geroago, Ukrainako Donetsk eskualdeko hiri horretatik ateratzen hasi direla jakinarazi zuen atzo Wagner talde paramilitarreko buru Jevgeni Prighozinek. Telegram bidez zabaldutako bideo batean azaldu zuen datorren ekainaren 1era arte arituko direla horretan, eta Errusiako armadaren unitateek hartuko dituztela orain arte haiek betetako tokiak.

Ukrainako Gobernuak ere baieztatu zuen Prigozhinek adierazitakoa, baina zehaztu zuen unitate aldaketa horiek hiriaren aldirietan egin dituztela, eta Errusiaren alde borrokatzen ari diren mertzenarioak hirian daudela oraindik ere. Hori esan zuen Hanna Maliar Defentsa ministrordeak, Telegram bidez. Aintzat hartu behar da Kievek ukatu egin duela Errusiako indarrek hiria konkistatu dutela, eta, Maliarren esanetan, hiriaren aldirietako zati bat kontrolpean dutela eta aurrera egiteko ahaleginean ari direla.

Higatze bataila bat da Bakhmutekoa: azkeneko hilabeteetako esanguratsuena, mediatikoena, baita odoltsuena ere. Prigozhinek berak herenegun azpimarratu zuenez, 20.000 bat paramilitar hil dira hango borroketan, eta horien erdiak Errusiako kartzeletan errekrutatutako presoak ziren; hain zuzen, gerraren ondorioz espetxeetan 50.000 bat pertsona errekrutatu zituztela jakinarazi zuen mertzenarioen buruak. Borrokarako behar beste munizio ez ematea egotzi izan dio Prigozhinek Errusiako Defentsa Ministerioari behin baino gehiagotan, eta Bakhmutetik alde egitearekin ere mehatxu egin dio. Vladimir Putin Errusiako presidenteak, bien bitartean, beste aldera begiratu du.

Aurreko urtearen amaieran gogortu ziren Bakhmuteko borrokak, eta oraindik ere ez dago argi hiriak balio estrategiko jakinik ote duen; aditu militarrak ez datoz bat diagnostikoan. Kievek adierazi izan du hura galtzea ez litzatekeela gerraren garapenean mugarri bat izango; Kremlinek uste du, ordea, tropak Kramatorsk eta Sloviansk hirietara hedatu ahal izango lituzketela, eta Donetsk eskualdea osorik konkistatzeko moduan egongo liratekeela.

Eta Bakhmuteko batailarekin lotuta, hain zuzen, Ukrainako iturri ofizialek atzo jakinarazi zuten Errusiak han preso hartutako 106 militar ukrainar aske utzi dituztela.

Bestalde, Kieveko iturri militarrek adierazi zuten aireko defentsa sistemek Errusiak jaurtitako 36 drone erorarazi zituztela atzo goizaldean, eta horiek, «ziurrenik», herrialdearen mendebaldeko azpiegitura militarrak zituztela helburu. Eta Errusiako Defentsa Ministerioak atzo adierazi zuen Ukrainako armadak jaurtitako hiru drone saiatu zirela Errusiako armadaren Ivan Khurs gerraontziari eraso egiten Itsaso Beltzean, baina «suntsitu» egin zituztela.