Egungo lanpostuen bosten bat arriskuan egon liteke teknologia berrien eraginez

Lanpostuen kopuruan baino gehiago, automatizazioak kalitatean eragin duela dio Orkestrak. Beharginek duten lanerako gehiegizko kualifikazioa daukate
Orkestra lehiakortasun institutuak atzo aurkeztu zuen Arabako, Gipuzkoako eta Bizkaiko ekonomiaren egoeraren berri ematen duen txostena.
Orkestra lehiakortasun institutuak atzo aurkeztu zuen Arabako, Gipuzkoako eta Bizkaiko ekonomiaren egoeraren berri ematen duen txostena. L. JAUREGIALTZO / FOKU

Lander Muñagorri Garmendia -

2019ko urriak 16
Datu kezkagarri bat eman du Orkestrak Arabako, Bizkaiko eta Gipuzkoako etorkizuneko enpleguaren eta enpresen lehiakortasunaren inguruan egin duen analisiak: oraintxeko enpleguaren bosten bat galtzeko arriskuan egon liteke teknologia berrien eraginez. Horrek lanpostuak galtzeko arriskua ekarriko du berarekin, baina baita egun ez dauden beharrak sortzea ere. Alegia, arriskuak eta erronkak sortuko ditu errealitate berriak, eta egoera horretara egokitzeko neurriak hartzeko gomendioa egin die institutuak enpresei.

Dena den, Mikel Navarro Orkestrako ikerlariak azaldu duenez, «automatizazioak ez du orain arte enpleguaren kopuruan eragin; bai, ordea, kalitatean». Lanpostuen baldintzak kaskartzen ari direla esan du, behin-behinekotasuna eta jardunaldi partzialak areagotzen ari direla, eta langileen arteko ezberdintasunak areagotzen ari direla.

Horregatik, «enpleguan gehiago inberti dezatela» eskatu die Navarrok enpresei. Azaldu duenez, enpresa askok beldur bat baitaukate: beharginei bere lanposturako kualifikazioa eskaini ondoren beste enpresa batera joango diren beldurra. «Baldintza onak eskainiz gero, zergatik joan nahiko dute beste nonbaitera? Beldur hori galdu beharra daukate enpresek».

Oraintxe Araban, Bizkaian eta Gipuzkoan dauden langileek bere lanposturako behar dutena baino kualifikazio handiagoa daukatela uste du Orkestrak. Horrek ondorio ugari ditu langileentzat eta enpresentzat, Navarroren arabera: «Pertsonentzako gastuak eta frustrazioa eragiten ditu, enpresetan txandakatzeak sortzen ditu, eta sistemak baliabide asko erabiltzen ditu kualifikazio hori lortzeko». Hala ere, argi utzi du ez dutela proposatzen ikasketetarako sarbidea mugatzea. «Kualifikazioa berez ona da, baina hezkuntza eta industria politikek bat egin behar dute». Alegia, eskaintza eta eskaria egonkortzeko lan egin behar dela.

Alde horretatik, atzerriko talentua erakartzeko egiten diren programen funtzioa egokitu beharko luketela ere azaldu du txostenak, eta hor ez dauden profilak erakartzeko lan egin dezatela nabarmendu. «Gehiegizko kualifikazioa arazo bat baldin bada, ez dauka zentzurik talentua erakartzeko programa orokorrak egitea», Navarroren arabera.

Lanpostuak, gainera, aldatzera egingo dute datozen urteetan. Aurreikuspenak beteko balira, Araban, Bizkaian eta Gipuzkoan erdibideko kualifikazioa behar duten lanpostuen zenbatekoa %46,7tik %51,7ra aldatuko litzateke 2018. eta 2030. urteen artean, eta goi kualifikazioa behar dutenena %33,9tik %32,2ra. Horregatik aipatu du institutuak hezkuntza sistemaren eta industriaren beharrek bat egin beharko dutela.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna
Lander Muñagorri Garmendia

Informazio osagarria

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna