Albistea entzun

Koronabirusa

Von der Leyen: «EBk aintzat hartu beharko luke derrigorrezko txertaketa»

Europako Batzordeko presidentearen iritziz, estatu kideek «ikuspuntu komun bat» behar dute. OMEk dio egunotan izango duela informazioa omikron aldaeraz
Bi bidaiari Johannesburgoko OR Thambo nazioarteko aireportuan, herenegun.
Bi bidaiari Johannesburgoko OR Thambo nazioarteko aireportuan, herenegun. KIM LUDBROOK / EFE Tamaina handiagoan ikusi

Ander Perez Zala -

2021eko abenduak 2

Ursula von der Leyen Europako Batzordeko presidentea nahitaezko txertaketaren auziaz mintzatu da berriz ere, eta zera esan du: EB Europako Batasuneko 27 estatu kideek eztabaidatu egin beharko luketela neurri hori zabaltzeaz. Agintariaren iritziz, «egokia eta zentzuduna» da inposaketa horretaz aritzea omikron aldaerari aurre egiteko: «EBk aintzat hartu beharko luke derrigorrezko txertaketa».

Austriak jada hartua du erabaki hori, eta Greziak iragan asteartean jakinarazi zuen bide beretik joko duela 60 urtetik gorakoekin; Alemanian, berriz, zenbait iturrik zabaldu dute Olaf Scholz datorren kantzilergaia ere neurriaren aldekoa dela. Horregatik, Von der Leyenek beharrezkotzat jo du auziaz eztabaidatzea eta estatu kideek «ikuspuntu komun bat» izatea.

Osasun arloko eskumenak ez dira Europako Batzordearenak, eta, beraz, herrialdeek beren lehentasunak finkatu eta ezinbestekotzat dituzten erabakiak hartzen dituzte. Horren aurrean, Bruselak 27 estatuburu eta gobernuburuak ados jartzea susta lezake estrategia bateratu bat ontzeko: «Kopuruei begiratzen badiezu, hau diote: EBko helduen %77 txertatuta daudela, eta, biztanleria osoa hartuta, %66. Horrek esan nahi du heren bat ez dagoela txertatuta. 150 milioi lagun dira. Asko da», argudiatu zuen atzo Europako Batzordeko presidenteak derrigorrezko txertaketaz aritzean.

Reuters berri agentziaren zenbaketaren arabera, atzo arte, Afrikako bost herrialdetan, Ameriketako hirutan, Asiako beste bitan, Europako 11tan eta Ekialde Hurbileko bakarrean Saudi Arabian aurkitu dute omikron aldaera; gutxienez 210 kasu dira, gehienak Hegoafrikan (ehun) eta Erresuma Batuan (22).

Zientzialariek oraindik ez dituzte omikron aldaerari buruzko xehetasun guztiak; hortaz, bien bitarterako, Europako Batzordeko presidenteak uste du murrizketak ezartzeak eta hirugarren dosia sustatzeak izan beharko luketela hartu beharreko erabakiak.

Aukera horretaz aritu zen OME Osasunaren Mundu Erakundeko Osasun Larrialdietarako Programako Maria Van Kerkhove ere, eta adierazi zuen gobernuen lehentasunak txertorik hartu ez dutenak txertatzea izan behar duela: «Ziurrenik, beste dosi bat emateak ez die ezertan lagunduko herritar gehienei. Herrialdeek txertorik ez dutenetan jarri beharko lukete arreta. Omikron aldaerari aurre egiteko modurik onena orain arteko neurriak mantentzea da: maskara erabiltzea, gutxieneko distantziari eustea eta eskuak garbitzea».

Van Kerkhoverekin batera mintzatu zen OMEren Osasun Larrialdietarako zuzendari nagusi Michael Ryan. Aldaera berriaz, azaldu zuen oraindik ez dutela transmisioari buruzko daturik, baina espero duela informazioa «datozen egunetan» izango dutela; atariko azterketen arabera, omikron aldaerak ez luke gaixotasun larririk eragingo herritar gehienetan, eta txertoen eraginkortasuna ez litzateke txikituko, Ryanen arabera. Sendagaien Europako Agentziak herenegun jakinarazi zuen aldaketarik behar izanez gero «hiru edo lau hilabete» beharko lituzkeela aldaera berrirako txertoak onesteko.

Horrez gain, Osasunaren Mundu Batzarrak atzo amaitu zuen hiru eguneko ezohiko biltzarra, eta 194 kideek adostu zuten aurreragoko izurriei aurre egiteko protokolo bat osatzea.

Portugal, «zoritxarrean»

Portugalen atzo sartu ziren martxoaren 20ra arte iraungo duen «zoritxarrezko egoeran», eta, egun berean, iragan otsailaz geroztik izandako positibo kopururik handiena erregistratu zuten: 4.670 —horietako hamalautan omikron aldaera atzeman dute—. Hamazazpi lagun hil ziren, eta intzidentzia tasa 349,8ra igo zen —100.000 biztanletik—, agintariek jakinarazi zutenez.

Atzodanik, herritarrek osasun ziurtagiria aurkeztu beharko dute jatetxeetan eta hoteletan sartzeko, baita eremu publiko itxietan eta ikuskizunetan ere. Antonio Costa jarduneko lehen ministroaren arabera, «aukerarik onena da neurriak ahalik eta azkarrena hartzea, eta horiek ahalik eta gutxiena eragitea herritarren bizitzan».

Hori bai, urtarrilaren 1etik 9ra tabernak eta diskotekak itxita izango dituzte, eta telelana derrigorrezkoa bilakatuko da.

Asko balio du irakurri duzun albiste/artikulu honek. Talde baten lanaren emaitza da.

Albiste hau zuri helarazteko eta talde honek bere lana baldintza egokietan egin dezan, BERRIAk ezinbestekoa du zure sostengua.

Zure babes ekonomikoarekin, aldi hau kontatzeko funtzioa betetzen jarraitu nahi dugu: kazetaritza konprometitu, kalitatezko eta independentea egiten.

Albiste gehiago

Emakume bat, Ukrainako soldadu bat irudikatzen duen mural baten aurretik pasatzen, Kieven, lehengo astean. ©EFE

Ukrainak segitzen du frontearen hegoaldean presioa handitu nahian

Igor Susaeta

Kievek jakinarazi du bederatzi pertsona hil zituela duela bi egun Krimean egindako bonbardaketan; aldarrikatu du, gainera, Zaporizhian «aurrerapauso handiak» ematen ari dela kontraerasoan
Pertsona batzuk Europako Batasunaren bandera baten aurretik pasatzen, Berlinen. ©OMER MESSINGER / EFE
Ukrainako armadako soldadu bat, tanke bat ondoan duela, aurreko uztailean Donetsk eskualdean (Ukraina). ©OLEG PETRASIUK / EFE

Fronteko lerroa ia ez da mugitu

Igor Susaeta

Hiru hilabete igaro dira Ukrainak kontraerasoa hasi zuenetik, baina ezin izan du eman aurreikusitako aurrerapausorik. Horrek eragina izan dezake Mendebaldearen jarreran.
Brasilgo indigena bat, atzo, herrialdeko Auzitegi Gorenaren aurrean, negarrez, indigenen lur jabetza eskubideari buruzko epaiaren berri izan ostean. ©Andre Borges, EFE

Indigenen jabetza eskubidea mugatzearen kontra ebatzi du Brasilgo Gorenak

Gorka Berasategi Otamendi

Nekazaritza eta abeltzaintza industrialaren lobbyak eta ultraeskuinak aurkeztutako argudioen kontra egin du epaileen gehiengoak. Horiek eskatzen zuten indigenen lurren aitortza mugatzea 1988an okupatuta zituztenetara.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...