Albistea entzun

Batez ere mamua uxatzeko

'Brexit'-a ekainaren 30era atzeratzeko proposatu dio EBri May Erresuma Batuko lehen ministroak. Tusk Europar Kontseiluko presidenteak luzapen «malgua» eskaini dio, gehienez urtebetekoa
Theresa May eta Donald Tusk hitz egiten, joan den urriaren 18an, Bruselan.
Theresa May eta Donald Tusk hitz egiten, joan den urriaren 18an, Bruselan. JULIEN WARNAND / EFE Tamaina handiagoan ikusi

Igor Susaeta -

2019ko apirilak 6

Oraingoz, datorren ostirala da brexit-aren eguna: apirilaren 12a. Baina Theresa May Erresuma Batuko lehen ministroak badaki ez duela denborarik ez laboristak ez dibortzio gogorraren aldeko tory-ak konbentzitzeko irteera akordioarekin bat egin dezaten; horrenbestez, dibortzioaren data datorren ekainaren 30era arte atzeratzeko eskatu dio Donald Tusk Europar Kontseiluaren presidenteari. Gutun bat bidali zion atzo goizean, eta segituan erantzun zioten Bruselatik. Tusken ahotik mintzatu ziren zenbait funtzionario hainbat hedabiderekin, eta jakinarazi zuten kontseiluaren presidenteak luzapen «malgu bat» eskaintzen duela, beste urtebetekoa gehienez. Laburragoa izan daiteke, betiere Komunen Ganberak ontzat ematen badu Londresek eta Bruselak joan den azaroan adostutako irteerarako akordioa. Hori bai, EB Europako Batasunak ez du aldiro ibili nahi dibortzioaren eguna aldatzen eta atzeratzen. Batez ere horregatik, baina, brexit gogorraren mamua —inongo akordiorik gabekoa— gero eta handiagoa delako egin du atzerapen luzeago baten aldeko hautua.

Komunen Ganberan ados jartzen ez diren bitartean, Bruselak du azken hitza auzian. Eta Mayk ondo gogoan dauka zer gertatu zitzaion duela bi aste pasa, ekainaren 30era arteko atzerapena eskatu zionean EBri: gehienez maiatzaren 22ra artekoa eskaini ziotela. Baina baldintza bat jarri zioten: parlamentuak apirileko lehen asterako onartu beharko zuen irteerarako akordioa. Ez da hori gertatu: joan den ostiralean ere, hirugarrenez, diputatuek uko egin zioten.

Mayk, beraz, Alderdi Laboristarekin hitz egiten hastea erabaki zuen. Aste honetan hainbatetan bildu dira Alderdi Laboristakoak eta Alderdi Kontserbadorekoak, eta azpimarratu dute negoziazioak «eraikitzaileak» direla. Jeremy Corbyn laboristen liderrak atzo adierazi zuenez, ordea, ez du «gobernuaren iritzietan» aldaketa «handirik» nabaritu. Tuski bidalitako gutunean elkarrizketa horiek aipatu ditu Mayk, eta nabarmendu «ikuspegi bateraturik» lortzen ez badute brexit-a gauzatzeko alternatibak proposatzeko eskatuko diela diputatuei. Dena dela, azkeneko hamar egunetan bi aldiz egin dira bozketa adierazgarriak deitutakoak, brexit-ari hainbat alternatiba ematen zizkiotenak, eta proposamen bakar batek ere ez zuen gehiengorik lortu Komunen Ganberan. Mayrentzat «etsigarria» da prozesua amaiera «ordenatu eta arrakastatsu batera» bideratu ez izana.

Bestalde, gutunean bada kontuan hartu beharreko beste aldagai bat. Ekainaren 30era arteko atzerapena eskatu du Mayk, eta tartean, maiatzaren 23tik 26ra, Europako Parlamenturako hauteskundeak egingo dituzte. Maiatzaren 23an Erresuma Batua ez bada oraindik EBtik banandu, Mayk onartzen du « legezko obligazioa» dutela hauteskundeetan parte hartzeko, eta gobernua horretarako «prestatzen» ari dela.

Dibortzioaren prozesua aurreikusi baino gehiago atzeratzen ari da. Dena den, tory-en artean badira jendaurrean itxaropentsu azaltzen direnak. Jeremy Hunt Atzerri ministroak atzo esan zuenez, brexit-a «hurrengo hilabeteetan» gauzatzea espero du.

Brexiter gogorrenek, bestalde, ez dute bat egiten Tuskek proposatutakoarekin. Horien liderretako bat da Jacob Rees-Mogg, eta adierazi zuen EBren egitekoak «ahal bezainbeste zailtzen» ahaleginduko direla baldin eta azkenean kontseiluko presidentearen planteamendua gailentzen bada.

Desadostasunak klubean

Europar Kontseiluak brexit-ari buruzko goi bilera egingo du asteazkenean Bruselan, eta, dirudienez, 27 estatu kideak ez datoz bat luzapen bat ematearekin —aho batez hartu beharra daukate erabakia—. Emmanuel Macron Frantziako presidentearen inguruko iturriek atzo adierazi zutenez, «goizegi» da luzapenaz hitz egiteko. Mark Rutte Herbereheetako lehen ministroaren esanetan, Mayren gutunak «galdera asko» eragiten ditu. «Argitasun» gehiago eskatu dio Londresi.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Helena Maleno, Caminando Fronteras taldeko bozeramailea, artxiboko argazki batean. ©ANGEL MEDINA G. / EFE

Marokoko Poliziak Espainiaratu egin du Helena Maleno ekintzailea

Arantxa Elizegi Egilegor

Caminando Fronteras taldeak salatu du inolako azalpenik eman gabe kanporatu dutela Maleno. Rabatekin elkarlanean aritzea egotzi diote Espainiako Poliziari

Guillermo Lassoren jarraitzaileak hauteskundeen bigarren itzulian lortutako garaipena ospatzen, igandean, Quiton. ©SANTIAGO FERNANDEZ / EFE

Eskuina correismoari gailendu zaio Ekuadorren, boto baliogabeez baliatuta

Julen Aperribai

Guillermo Lasso kontserbadorea izango da presidente, Andres Arauz UNESeko hautagaiari gailenduta. Baliogabe bozkatzeko deia egin zuen mugimendu indigenak, eta mesede egin dio horrek eskuineko hautagaiari

Natanz zentral nuklearra, artxiboko irudi batean. ©ABEDIN TAHERKENAREH / EFE

Iranek Israeli leporatu dio Natanz zentralari eraso egin izana

Iosu Alberdi

Teheranen programa nuklearreko gunerik garrantzitsuena da. Akordioaren aurkako «saiakera oro» gaitzetsi du EBk

Japoniako Gobernuaren erabakiaren aurkako protesta bat Seulen. / ©Jeon Heon-kyun, EFE

Fukushimako ur kutsatuak itsasora botako ditu Japoniak

Arantxa Elizegi Egilegor

Orotara 1,23 milioi tona ur daude zentral nuklearreko biltegietan. Prozesua datorren urtean hasiko dute, eta baliteke beste hainbat urte irautea.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Igor Susaeta

Informazio osagarria

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna