Albistea entzun

Vingegaard izar nagusia Itzulian

Frantziako Tourreko garailea Euskal Herriko errepideetan izango da. Daniel Felipe Martinez iazko txapelduna ere lehian izango da. Lasterketa apirilaren 3tik 8ra jokatuko da
Jonas Vingegaard iaz, Euskal Herriko Itzuliko azken etapan, Arraten.
Jonas Vingegaard iaz, Euskal Herriko Itzuliko azken etapan, Arraten. JUAN HERRERO / EFE Tamaina handiagoan ikusi

Beñat Mujika Telleria -

2023ko martxoak 24 - Eibar

Txirrindularitza gosea nabarmena da Euskal Herrian, eta Euskal Herriko Itzuliarekin ase beharko dute zaleek. Hala ere, ez dute edozer gauza dastatuko, menurik garestieneko platerik preziatuena izango baitute begien aurrean. Jonas Vingegaard (Jumbo-Visma) Frantziako Tourreko azken garailea euskal errepideetan izango da. Danimarkako txirrindularia da Tadej Pogacar (UAE), hau da, azken urteetan txirrindularitzan gailendu den ziklista itzuli handi batean garaitu duen bakarra, eta Euskal Herriko Itzulian izango da iaz Parisen loria lortu ostean. Itzulia lehen aldiz irabazten ahaleginduko da Jumbo-Vismako liderra. Iaz zazpigarren egin zuen, eta 2021ean bigarren, Primoz Roglic taldekidearen atzetik.

Duela aste batzuk, ibilbidearen berri eman zuen antolakuntzak; gero, kartel ofiziala eta maillotak ezagutarazi ziren, eta atzo goizean aurkeztu ziren benetako protagonistak, Eibarren —2023ko Europako Kirol Hiria eta lasterketa amaituko den herria—. Behin-behineko parte hartzaileen zerrendan 23 talde izango dira —hemezortzi World Tourrekoak eta bost UCI Pro Teamekoak—, eta goi mailako txirrindulari ugari. Daniel Felipe Martinezek (Ineos) irabazi zuen txapela iaz, eta bigarren aldiz irabazten ahaleginduko da. Baina kolonbiarrak aurkari gogorrak izango ditu. Besteak beste, Richard Carapaz txapeldun olinpikoa (Education First). Enric Mas (Movistar), Adam Yates (UAE), Juan Ayuso (UAE), David Gaudu (FDJ), Simon Yates (Jayco) eta Emanuel Buchmann (Bora) izango dira lehen postuetan sartzeko lehiatuko diren beste txirrindulari batzuk. Horietako asko Katalunian dira orain, Voltan lehiatzen.

Apirilaren 3tik 8ra jokatuko da 62. Euskal Herriko Itzulia, eta zenbait berritasun ere izango ditu aurtengo lasterketak. Ez da erlojupeko saiorik izango, eta, hortaz, faborito guztiak buruz buru arituko dira sei egunez. Tarteko helmugetan eta helmuga nagusian gainsariak izango dira. Tarteko helmugetan, hiru segundo lortuko ditu lehenengoak, bi bigarrenak eta bat hirugarrenak. Helmuga nagusian, berriz, hamar, sei eta lau segundo banatuko dira lehen hiru sailkatuen artean. Hortaz, berebiziko garrantzia izango du talde lanak eta liderrak une oro ondo kokatuta egoteak.

Gasteizen abiatuko da aurtengoan lasterketa, eta sei etapa jokatuko dira guztira, ohikoa den bezala. Lehen etapa Bastidan (Araba) amaituko da. Bigarren etapak, berriz, Viana (Nafarroa) eta Leitza (Nafarroa) lotuko ditu, 2022an bezala, baina aurten kontrako bidea egingo dute ziklistek. Hirugarren etapan Gipuzkoan sartuko da tropela, eta Errenteriatik Villabonarako bidea egingo du. Laugarren etapan, Bizkaian sartuko da Itzulia, eta Omar Frailek diseinatutako etapa jokatuko dute, txirrindulari horren jaioterrian hasi eta bukatuta: Santurtzi-Santurtzi. Eibarrera iritsi aurretik, Zornotzan hasi eta amaituko den etapa jokatuko da, eta larunbatean jarriko zaio ginga lasterketari, Eibarren. Azken hiru Itzulietan, azken etapan erabaki da nor izango zen maillot horiaren jabea, eta Arrateko aldapak erabakigarriak izango dira aurten ere. Hala ere, Itzulia aurten ez da Arrateko gainean amaituko, herriaren erdigunean baizik.

Okerrik ezean, 22

Euskal Herriko itzulian hainbat euskal herritar egoten da tropelean. Zaleek modu berezian hartzen dituzte beti, eta txirrindulariek lasterketa kuttuntzat daukate Itzulia. Aurten ere, hainbat ordezkari izango ditu euskal txirrindularitzak. Lau euskal talde izango dira Itzulian (Movistar, Euskaltel-Euskadi, Kern Pharma eta Caja Rural), eta okerrik ezean, 22 euskal txirrindularik parte hartuko dute.

Oilar nagusiekin mokoka arituko dira seguruenik Mikel Landa eta Pello Bilbao (Bahrain), baita Euskal Herriko Itzuliko azken euskal txapelduna ere: Ion Izagirre (Cofidis). 2019an irabazi zuen lasterketa Ormaiztegikoak, Astana taldean zegoenean. Hauek izango dira beste hemeretzi euskal ziklistak : Jonathan Castroviejo eta Omar Fraile (Ineos), Jonathan Lastra (Cofidis), Alex Aranburu eta Gorka Izagirre (Movistar), Jon Aberasturi (Trek), Ander Okamika (Burgos-BH), Jokin Murgialdai eta Jon Barrenetxea (Caja Rural), Victor de la Parte (Totalenergies), Jon Agirre, Igor Arrieta, Iñigo Elosegi eta Ibon Ortiz (Kern Pharma), eta Mikel Bizkarra, Asier Etxeberria, Unai Iribar, Txomin Juaristi eta Gotzon Martin (Euskaltel-Euskadi).

Asko balio du irakurri duzun albiste/artikulu honek. Talde baten lanaren emaitza da.

Albiste hau zuri helarazteko eta talde honek bere lana baldintza egokietan egin dezan, BERRIAk ezinbestekoa du zure sostengua.

Zure babes ekonomikoarekin, aldi hau kontatzeko funtzioa betetzen jarraitu nahi dugu: kazetaritza konprometitu, kalitatezko eta independentea egiten.

Albiste gehiago

Urola Kostako Hitza ©Andoni Iruretagoiena 'Izeta VI'.a, atzo, garaipena ospatzen.

Hirugarren urtez jarraian, Izeta VI.ak jantzi du Euskal Pentatloi Sariaren txapela

Ihintza Elustondo - Urola Kostako Hitza

Ez da sorpresarik izan VI. Euskal Pentatloi Sariaren finalean, eta Andoni Iruretagoiena Izeta VI.a aiarrak jantzi du txapela; emazteari eta semeari eskaini die garaipena. Xabat Olaizola zarauztarra sailkatu da bigarren, eta Xabier Zaldua hirugarren. Aritz Irazabal izan da laugarrena, Ioritz Gisasola bosgarrena, eta Julen Kañamares seigarrena.

Jose Luis Zubizarreta. ©Maialen Andres, Foku

«Iraurgin baino ardura handiagoko lanik ez dut edukiko inoiz»

Unai Zubeldia, Gipuzkoako Hitza

Jose Luis Zubizarreta 11 urterekin joan zen Azpeititik Valentziara, bakar-bakarrik, eta Azpeitia-Azkoititik Donostiarako saskibaloi bidea egin du orain, 62 urterekin. Proiektua biziberritu nahi du.

Osasunako jokalari Chimy Avila eta Ivan Rakitic Sevillakoa, baloiaren lehian, atzo, Sadarren, Espainiako Ligako seigarren jardunaldian. ©IÑIGO URIZ / FOKU

Frustrazioaren gatibu

Eñaut Agirrebengoa

Osasunak hobera egin du defentsan, baina ez du asmatu ate aurrean, eta puntu gazi-gozoa lortu du Sevillaren aurka. Nafarrek etxean irabazi gabe segitzen dute

Athleticeko jokalariak, lehen gola ospatzen, Iñaki Williamsen sartutakoa. ©L. RICO / EFE

Beste derbi zuri-gorri bat

Julen Etxeberria

Hogei urteren ostean, Athleticek Alavesi irabazi dio Mendizorrotzan. Garaipena lortuta, zuri-gorriek indartu egin dute egiten ari diren sasoi hasiera ederra. Arabarrek aurreneko aldiz galdu dute etxean

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...