Albistea entzun

Musikazko bidaiak eta bisaiak

Zazpi film luze eta zortzi labur egongo dira lehian XIV. Dock of the Bay zinemaldian, etzitik hilaren 12ra bitartean. Proiekzio bereziak, zuzeneko emanaldiak, solasaldiak eta kontzertuak ere antolatu dituzte
<em>The Sound Is Innocent</em> dokumentaleko irudi bat.
The Sound Is Innocent dokumentaleko irudi bat. DOCK OF THE BAY Tamaina handiagoan ikusi

Andoni Imaz -

2021eko ekainak 5

Zinema eta musika, elkarren artean ez ezik, bizitzarekin ere nahasteko asmoz abiatuko dute etzi XIV. Dock of the Bay, Musika Zinema Dokumentalaren Donostiako Jaialdia. «Udatiarragoa, borrokalariagoa, inoizko bereziena», antolatzaileentzat. Ekainaren 7tik 12ra egingo dute aurten, ohi baino hilabete batzuk beranduago; izan ere, aurrez aurreko jaialdi bat izan zedin nahi zuten. Eva Rivero zinemaldiaren zuzendariak azaldu zuen aurkezpenean: «Badakigu arretaz jokatu behar dugula, baina baita bizitzarako funtsezkoak diren espazio horiek birpentsatzeko eta berriro konkistatzeko beharra dagoela ere».

Truebako bigarren aretoaz jabetzeko prest dituzte 23 dokumental, berritasun nagusi batekin: film laburren lehiaketa bat ere izango du Sail Ofizialak. Eta egitarau zabal horren barruan, bi asmo aipagarri: Rafael Berrio omentzea, eta emakume zinemagileei eta LGTBI komunitateari ikusgaitasuna ematea. Emanaldi guztietarako sarrerak salgai dira dagoeneko.

SAIL OFIZIALA: FILM LUZEAK

Zazpi lan luze ariko dira jaialdiko sari nagusia irabazteko lehian, eta horietatik bost aurrez estreinatu gabeko pelikulak dira. Helmut Lachenmann: My Way da aurrenekoa, Wiebke Popelek zuzendua. Lachenmann konpositore entzutetsuaren erretratu bat da; hark musika konkretu instrumentala izeneko estilo berezi bat garatu du azken mende erdian.

Biharamunean, Dima Punk emango dute, Dominique Caubet frantziarraren lehen lana. Pelikulak Marokon punk izaten jarraitzeko zailtasunak erakusten ditu. The Sound Is Innocent pelikula «ikus-entzunezko bidaia» baten gisan deskribatu dute. Soinu elektronikoaren eta esperimentalaren mundua aztertzen du. Johana Ozvold txekiarrak egina da.

Jose Permar mexikarraren Fuera del camino filma AEBen eta Mexikoren arteko mugan dago girotuta. Han egiten den lasterketa bat kontatzen du, musikari gazte batzuek Kaliforniako basamortuari buruz abesten dituzten kantuek lagunduta. Celeste Bell eta Paul Sng zuzendarien Poly Styrene: I Am a Cliché ere emango dute. Styrene punk ikono bat izan zen, X Ray Spex taldeko burua. Haren alabak egindako bidaia bat kontatzen du filmak.

Sempre dijous filmak ere bidaia batez hitz egiten du: Palma (Herrialde Katalanak) eta Bartzelona arteko joan-etorri batez, eta soinu tradizionaletatik traperakoaz orobatsu. Subterranean filmean, dena utzi eta rock izarrak izateko asmoz abiatzen den bikote baten istorioa jaso dute Manuel Matanzak eta Gabriel Velazquettik.

SAIL OFIZIALA: FILM LABURRAK

Zortzi labur emango dituzte, saio bakarrean, ekainaren 10ean. Kris Bowers eta Ben Proudfooten A Concerto Is a Conversation-ek jazz musikari baten leinua arakatu du. Belaunaldien erretratua da A Deer Falling into the See, antsietateari eta depresioari buruzko saiakera bat, Marco Huertasek zuzendua. Ikusleei flamenko musikaren eta kulturaren berri emango die Canto porque tengo que vivir lanak. Santiago Mogak eta Carlos Revertek egin dute, Israel Fernandez kantaria ardatz hartuta. Entre el monte y la marisma-k Rafael de la Rosa Camarón de Plata eta Juan Mendoza Juanillo lagunen arteko harremana kontatzen du. Zuzendariak Niete izenez sinatu du lana. Aura Satzek Beatriz Ferreyra konpositore elektroakustiko argentinarrari buruzko labur bat egin du, Hacer una diagonal con la música izenekoa. Tana Garridok Habanan kokatu du La tierra llama, eta euskal jatorriko lau emakumeren istorioa kontatu du. Eloy Dominguez zuzendariak Ourenseko (Galizia) inauteri ikusgarria eraman du Os corpos filmera. Azkenik, Elmer Guevararen Still Hungry emango dute. Gijongo (Espainia) skate mundua eta kale giroa azalduko ditu lanak.

PERFECT DAY SAILA

Nazioarteko dokumentalen aukeraketa bat egin du jaialdiak Perfect Day sailerako. Donostian oraindik eman ez dituzten zortzi film proiektatuko dituzte. Musika elektronikoaren munduan aitzindari izan diren emakumeei buruzko Sisters with Transistors izango da lehena, Lisa Rovnerrek zuzendutakoa. Stanley Sundayk zuzendutako Stop! izeneko komedia musikala ere emango dute; Bartzelonako Doble Pletina taldea da protagonista. Joel Zito Araujo zuzendariak My Friend Fela lana egin du Fela Kuti musikari nigeriar ezagunari buruz. Hari buruzko ikuspegi berri bat ematea da filmaren helburua. Eta Rafael Berrioren azken diskoa hasieratik bukaerara entzuteko aukera emango du Andres Daniel Sainzen Escuchando 'Niño futuro'-k. Berriok berak gidatu zuen dokumentala.

Sail honen barruan, bi emanaldi egingo dituzte Dabadaba aretoan: Beyonceren jarraitzaile batzuei buruzko Waiting for B (Paulo Cesar Toledo, Abigail Spindel), batetik; eta Samantha Hudson ikonoklastaren gaineko Samantha Hudson: Una historia de fe, sexo y electro-queer (Joan Porcel), bestetik. Beste bi saio egingo dituzte Antzoki Zaharrean: The Mistery of the Pink Flamingo (Javier Polo) eta Summer of Soul (Ahmir Questlove Thompson).

SAIL PARALELOAK

Jaialdiaren barruan bestelako ekintza batzuk ere egingo dituzte. Ikusle Berriak sailean, pelikula bat eta tailer bat emango dituzte, gazteak zinemaren eta musika dokumentalaren mundura erakartzeko asmoz. Elkarrizketak atalean, bi solasaldi egingo dituzte zinemaren eta musikaren alorreko zenbait gonbidaturekin, sormenari eta industriari buruzkoak. Dock Live sailak zuzeneko musika eta film emanaldiak batuko ditu Tabakaleran lau emanalditan, eta hilaren 12an musika izango da Dabadaban: DJak lehenengo, eta Las Penas taldea gero.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Etxepare institutuko leihoen nondik norakoak azaldu dituzte goizean, Bilboko Azkuna zentroan ©Foku

35 euskal sortzaile egongo dira nazioarteko bederatzi jaialditan

Amaia Igartua Aristondo

Etxepare Euskal Institutuaren leihoen bitartez, Kataluniako, Espainiako, Frantziako eta Portugalgo festibaletan erakutsi ahal izango dute euren lana kulturgileek. Osasun egoeraren ondorioz, gertuko topaketak lehenetsi dituzte

Landarteren antolatzaileetako batzuk, aurkezpenean, Iruñean. ©IÑIGO URIZ / FOKU

Landarte arte garaikideko programa Nafarroako sei herritan egingo dute

Ane Eslava

Nafarroako Gobernuak bosgarren urtez antolatu du landa eremuan kultur garaikideko sortze prozesuak sustatzeko Landarte programa.

 ©Gorka Rubio / FOKU
Iker Antia Arteztu galeriako arduraduna, Gorka Larrañaga artistak ikusgai jarritako obretako bi alboetara dituela, Donostian. ©GORKA RUBIO / FOKU

Artez marraztutako hirukia

Ainhoa Sarasola

Sortzaileak, ikasleak eta auzoa. Hiru osagai horiek lotzeko asmoz zabaldu zituen ateak Donostiako Arteztu galeriak duela hamar urte. Arte eskolak eskaintzea du bereizgarri.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.