Lurralde elkargoaren eskaera eramaten segituko du koordinakundeak

Frederique Espagnac senatariak Ipar Euskal Herriarentzako sindikatu misto baten sorrera planteatu baldin badu ere, euskal lurralde elkargoaren alde dabilen koordinakundeak hastapenetik era- mandako eskaera egiten segituko du. Frantziako Gobernuak Lapurdiren, Nafarroa Beherearen eta Zuberoaren gero instituzionalari buruzko eztabaida fasea irekitzea espero dute koordinakundea osatzen duten Hautetsien Kontseiluak, Garapen Kontseiluak, Batera-k, Auzapezen Biltzarrak eta Baionako Merkataritza eta Industria Ganberak.

Horrez gain, deszentralizazio erreformari buruz Frantziako Parlamentuan abiatu eztabaida «hurbiletik segitzen» dutela diote. Orain arte egindakoa baloratzeko bilera ukan zuten atzo koordinakundekoek. Agiri labur baten bidez plazaratu zuten haien balorazioa. Espagnacek haiei aipatu gabe senatuan aurkeztu aldaketari buruz ez dute haien jarrera zehaztu.

Orain arte egindakoaz kontent

2012ko azaroaren 24an Hautetsien Kontseiluak euskal lurralde elkargoaren alde bozkatu zuenaz geroz egindako lanaz «satisfos» azaldu da koordinakundea.

Eskaera horren inguruan lortu duten adostasun zabalaz pozikdira: «Inoiz ez du proiektu partekatu eta estrukturatu batek hain adostasun zabala lortu; sekula ez da ikusi hein horretako hautetsi, eragile eta herritar multzo plurala». Ekainaren 1ean Baionan 6.000 lagunek François Hollande presidenteari egin eskaerari gobernuak baikorki erantzun behar duela diote. Ausardiaz jokatu eta behin eta berriz emandako erantzun ezkorrak alde batera utzirik, Ipar Euskal Herriaren aldarriari baikorki erantzuteko eskatu zioten: «Lehendakari jauna, ausardia erakuts ezazu, lurralde honen eskaera kontuan har ezazu, eta ezinbestekoa den erantzun politikoa emaiozu».

Finkatu agendari segi, ondoko asteetan Parisen egin behar luke prentsaurrekoa koordinakundeak, Frantziako komunikabideei eraman eskakizuna aurkezteko.