Ikus dezagun

Telebista kritikarako espazioa da hau. Iritzia ematekoa. Eta horretarako, ezinbestekoa da jopuntua izango den edukia aurrez ikustea. Baina salbuespen gisara, baimenduko didazu ahotan hartzea oraindik ikusi gabeko zerbait. Ez hori bakarrik. Doako publizitatea eginez, ikusteko eskatuko dizut. Behar zuena baino beranduago, eta ez hasiera batean adostutako plataforman, baina gaur estreinatu da En el nombre de ellas: Kote Cabezudo argazkilariaren bortxaketa, sexu-eraso eta manipulazio joeren berri ematen duen dokumentala. Netflixen dago ikusgai, azkenean, hasierako asmoak bestelakoak baziren ere.

Ez dut ikusi; baina ikusiko dut, berehala. Orain arteko gorabeherak publizitate kanpaina bikaina izan dira. Baina gaur bertan helduko badiot ez da soilik azken orduko jokaldi arraro samarrean Disney Plusek baztertu egin zuelako. Askoz urrunagotik dator Cabezudoren (eta enparauen) bueltako isiltasun orokortua. Diskrezio handiz jorratu dute hedabideek beti, hanka sartzeko beldurrez. Besteak beste, zenbait hedabidek harreman zuzena izan dutelako Cabezudorekin. Eta horrek, ezinbestean, susmo eta uste ilun asko haizatu ditu. Azalpen eskasak izan ditugu orain arte, eta hitza hartu duten apurren esanak zalantzan jarri izan dira. Bai, behintzat, Kote Cabezudo kondenatua izan den arte.

Urtzi Urkizu kazetariak bai, ikusi du dokumentala. Eta atzo bertan adierazi zuen, egunkari honetan, badituela herren bat baino gehiago. Mario Diez abokatuaren eta Melchor Miralles kazetariaren begiradatik eraikitakoa da dokumentala. Biak ala biak dira iturri deserosoak, erabat fidagarriak egiten ez zaizkidanak. Baina aitortu behar zaie haiek tematu zirela kasuari bete-betean heltzen beste gehienek mesfidantzaz begiratzen ziotenean. Eta garrantzitsuagoa dena: dokumentalak erasoak jasan zituzten emakumeei ere ematen die hitza.

Gauza batzuk zalantzaezinak dira: Kote Cabezudoren bortxaketa eta eraso etengabeak Donostian gertatu ziren. Orain ez horrenbeste urte. Makina bat politikariren argazkilari kutuna zen bitartean. Eta urte luzez jardun zuen inpunitate osoz. Hala zioen Kontxako marko konparaezineko hondarrean idatzita agertu den mezuak: «Bazenekiten denek. Orain ikusi egingo duzue». Jakin edo ez jakin, ikus dezagun, bada.