Noiz sortua: 2019-09-18 00:30:00

Urkulluk autogobernua «eguneratzeko» ituna eskatuko du ostiralean

Lehendakariak aldebiko ituna aldarrikatuko du politika orokorreko eztabaidan. Iraganari buruzko «gogoeta kritikoa» galdegingo du. EH Bilduk Urkulluri eskatu dio «Madrilera begiratzeari» uzteko
Iñigo Urkullu, joan den abuztuan, Donostiako Miramar jauregian.
Iñigo Urkullu, joan den abuztuan, Donostiako Miramar jauregian. J. C. RUIZ / FOKU Tamaina handiagoan ikusi

Edurne Begiristain -

2019ko irailak 18

Etzi abiatuko du Eusko Legebiltzarrak XI. legealdiko azken urte politikoa, politika orokorreko osoko bilkurarekin. Espainiako blokeo politikoak eta hauteskunde berri posibleek baldintzatuta egingo da eztabaida, eta arreta berezia jarriko zaio Iñigo Urkullu lehendakariak emango duen hitzaldiari. Lehendakariak bere agintaldian martxan jarritako ekinbideen bilduma egingo du, eta berriak iragarriko ditu.

Eusko Jaurlaritzak atzo bidali zizkion legebiltzarrari Urkulluk eskainiko duen hitzaldiaren gidalerro nagusiak. Laburpenak jasotzen duenez, Gernikako Estatutua betetzeko eta hura «eguneratzeko eta birformulatzeko» ituna eskatuko ditu lehendakariak. Madrilekin akordioa lortzea da Urkulluk askotan defendatu duen bide orria, eta ideia bera azpimarratuko du etziko eztabaidan. Adostutako itunak «elkar aitortzan» eta «aldebikotasunean» oinarrituta egotea eskatuko du atzera.

Araba, Bizkai eta Gipuzkoarako estatus berriaren testu artikulatua idazten ari da legebiltzarrak izendatutako aditu taldea, eta azarorako espero da txostena prest egotea. Urkulluk gogoan izango du bost adituek eskuartean duten egitekoa, eta adieraziko du helburua izan behar duela «barne akordioa zabaltzeak» eta autogobernua «eguneratzeak eta sakontzeak».

Estatutu berri bat lortzea izango da Jaurlaritzaren helburuetako bat, baina ez bakarra. Bizikidetzaren eta giza eskubideen esparruan, «iraganari buruzko hausnarketa kritiko globala» sustatzen jarraitu nahi du Urkulluk, «ETAren indarkeria esplizituki barne hartuta, eta, lehenbiziko aldiz, indar politiko guztiek partekatzeko modukoa». Halaber, memoriaren eta biktimen aitorpenaren inguruan «partaidetza espazioak» handitu nahi dituela jakinaraziko du.

Jaurlaritzak 2030. urtean jarriak ditu begiak, eta ordurako martxan nahi ditu «eraldaketa teknologiko-digitala», «energetiko-ekologikoa» eta «demografikoa». Hiru helburu horiek lortzeko politikak xehatuko ditu lehendakariak legebiltzarreko eztabaidan. Gainera, lehentasunen artean jarriko du legealdia amaitu baino lehen emakumeen aurkako indarkeria desagerrarazteko lege proiektua lantzea, eta hezkuntzari buruzko lege aurreproiektua onartzea.

Ostiraleko bilkuran lehendakariari erantzuteko aukera izango dute taldeek, arratsaldeko saioan. Oposizioa oso kritiko agertuko da Jaurlaritzaren kudeaketarekin. EH Bilduk, esaterako, Urkulluri eskatuko dio «Madrilera begiratzeari uzteko», eta euskal herritarren arazoei konponbideak bilatzen hasteko, EAE atera dadin bizi duen «geldiunetik». Maddalen Iriarte EH Bilduko bozeramaileak atzo ohartarazi zuen Espainiako ezegonkortasun politikoa «kronikoa» bilakatu dela, eta Urkulluren erruz giro horretaz kutsatzeko «arriskua» dagoela Araban, Bizkaian eta Gipuzkoan ere.

EH Bilduren eskaerak

Bestetik, bi eskaera luzatu zizkion Iriartek Urkulluri. Batetik, estatus politikoari buruz EAJk EH Bildurekin lortutako akordioa errespetatzeko, eta, bestetik, 2020ko aurrekontuak EH Bildurekin adosteko. Aurrekontuei dagokienez, Iriartek ohartarazi zuen «ezbeharra» litzatekeela Eusko Jaurlaritzak PPrekin egitea aurrekontuetarako akordioa.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Maiatzaren 28an eguneratua, 18:00etan. ©BERRIA

Koronabirusaren azken datuak

Berria

Azkeneko 24 orduetan hiru pertsona hil dira COVID-19 gaitzaren eraginez, 23 positibo atzeman dituzte PCR probekin, eta sei gaixo ospitaleratu dituzte. Euskal Herrian 28.976 gaixok eman dute positibo guztira, koronabirusa atzemateko probaren bat eginda. Horietatik 2.037 hil dira. Grafikoak, albiste barruan.

Donostiako Kontxa hondartza, pasa den asteartean. ©Gorka Rubio, Foku

Hondartzen erabilera «dinamikoa» egiteko eskatu du Jaurlaritzako Osasun sailak

Berria

Osasun sailak eskatu du hondartzak kirola egiteko, paseatzeko eta bainatzeko erabiltzea, baina ez hareatan geldirik egoteko. Bizkaian Areetan, Lagan, Laidan eta Ean hartu dute hondartza «dinamikoak» ezartzeko erabakia. Lapurdiko hondartzak maiatzaren 16an ireki zituztenetik dira «dinamikoak».

Mari Luz Esteban eta Elixabete Garmendia. / ©GORKA RUBIO, FOKU

«Zahartzaroari ematen zaion tratamenduaren metafora da gertatu dena»

Maider Galardi F. Agirre

Koronabirusaren krisia piztu denetik, maiz hitz egin da adinekoen zaurgarritasunari buruz, eta, oraindik, kalera irteteko mugak dituzte adinekoek. Mari Luz Esteban antropologoak eta Elixabete Garmendia kazetariak, ordea, salatu dute adinkeria dagoela, eta beharrezkoa dela nagusiagoei ahots propioa ematea.

Hezkuntza arloko lan eskaintza publiko baterako proba, Barakaldoko BECen, 2018ko ekainean. ©MONIKA DEL VALLE / FOKU

Jaurlaritzak hezkuntzako lan eskaintzara aurkezteko epea irekiko du astelehenean

Jon O. Urain

Epea etenda geratu zen alarma egoera indarrean sartzean. Ekainaren 1etik 5era bitartean egongo da zabalik.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna