Mugaz gaindiko gazte bilgunea

Eusko Ikaskuntzak Gazte Agora egitasmoaren ondorioak aurkeztu ditu, eta foro berri bat iragarri
Ander Vizan, Juan Gutierrez, Maialen Olabe, Xalbat Alzugarai eta Leire Zabala, atzo, Irunen.
Ander Vizan, Juan Gutierrez, Maialen Olabe, Xalbat Alzugarai eta Leire Zabala, atzo, Irunen. ANDONI CANELLADA / FOKU Tamaina handiagoan ikusi

Maider Galardi F. Agirre -

2021eko urtarrilak 14

Nafarroa, Lapurdi eta Gipuzkoako mugak elkartzen diren tokitik metro gutxira, Irungo (Gipuzkoa) Ficoba erakustokian egin du prentsaurrekoa Eusko Ikaskuntzaren Gazte Agora egitasmoak. Tokia nahitara aukeratu dute: gazteen mugaz gaindiko elkarguneak sustatu nahi dituztelako, eta agerraldira joan diren ordezkariek ere badute zer esana. Bertan dira: Maialen Olabe Euskadiko Gazte Kontseiluko presidentea, Juan Gutierrez Nafarroako Gazteriaren Kontseiluko presidentea eta Eusko Ikaskuntzako Gazte Agorako kide Xalbat Alzugarai, Ander Vizan eta Leire Zabala. Esku artean txosten mardul bat dute, hiru hizkuntzatan osatua —euskaraz, gaztelaniaz eta frantsesez—: Euskal Herriko gazteriak egungo egoeraren gainean egiten duen diagnostikoa osatu dute lau arlotan, eta hiru administrazioez gaindiko —EAE, Nafarroa eta Euskal Hirigune Elkargoa— foro bat ere iragarri dute udaberrirako.

Batzen gaituen norabidean dokumentua da atzo Irunen aurkeztutakoa. Egitasmoaren sustatzaileek azaldu dutenez, hiru saio egin dituzte azken bi urteetan, Iruñean, Donostian eta Baionan, eta, guztira, 60tik gora gaztek parte hartu du dinamikan. Lau ardatzen gainean aritu dira gogoeta egiten: ongizate materiala, hizkuntza politikak, hezkuntza eta gobernantza. Arlo horietan gazteen ikuspegitik dauden arazoak identifikatzen eta horiei aterabidea bilatzeko proposamenak egiten aritu dira, eta txosten batean bildu dituzte ondorioak; bai lurralde bakoitzaren analisia, eta baita hiru administrazioen pean egonagatik ere martxan jar daitezkeen neurriak.

Olabek aurkeztu du arlo sozioekonomikoarekin lotura duen atala: «Euroeskualdeko gazteek zailtasun handiak dituzte bizi proiektuak garatu ahal izateko». Zehazki, etxebizitzaren eta lan prekarioen auziari egin dio erreferentzia, eta nabarmendu du zazpi lurraldeetako gazteek identifikatzen dituztela bi faktore horiek ongizatea bermatzeko aldagai gisa. Horregatik, Gazte Agorak proposatu du mugaz gaindiko jarduera sozioekonomikoak bultzatzea, eta etxebizitzaren eta enpleguaren arazoari gazteen ikuspegi batetik heltzeko proposamenak lantzea. Besteak beste, gazteentzako etxebizitzak aipatu dituzte dokumentuan.

Alzugaraik, berriz, euskarari egin dio erreferentzia. Ohartarazi du euskararen egoera ez dela bera Euskal Autonomia Erkidegoan, Nafarroan eta Euskal Hirigune Elkargoan, baina Euskal Herri osoan hartu beharko litzatekeela euskara «aberastasun» gisa. Horregatik, eskatu dute euskarari ikusgaitasuna emateko, eta ez ideologizatzeko hizkuntza. Neurri zehatzak ere proposatu dituzte: administrazio publikoan euskara sustatzea, euskarazko jarduerentzako diru laguntzak handitzea, eta hiru lurralde administrazioak barnebiltzen dituen erakundeak ere indartzea, euskara ardatz izango dutenak.

Olabek euskararen auziari hezkuntzarena gehitu dio. Lurralde administratibo bakoitzak bere hezkuntza sistema propioak eta berezitasunak ditu, baina zeinbait proposamen jarri ditu mahai gainean: «Erronka da aniztasuna eta hezkidetza hezkuntzan txertatzea. Horretarako, beharrezkoa da ikasleen parte hartzea eta, oro har, hezkuntzan ari diren eragileen elkarlana sustatzea».

Eta, ikasleen parte hartzeaz gain, gazteen parte hartzea eta erabakitzeko ahalmena indartu behar dela ondorioztatu dute gobernantzaz aritzerakoan, Gutierrezek azaldu duenez, eta erakundeei eskatu diete horretarako baliabideak ipintzeko.

Topaketa udaberrian

Gazteei dei egin diete Gazte Agoran parte hartu eta udaberrian egin nahi duten mugaz gaindiko foroan parte hartzeko, «elkarrekin eraikitzen segitzeko».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

 ©JON URBE / FOKU

«Jaurlaritzak badaki gobernu alternatiba bakarra EH Bildu dela»

Jon O. Urain

Aurrekontu «kontserbadoreak» egitea eta EH Bildu «higatzeko errelato bat» osatzea egotzi dio Iriartek Jaurlaritzari.

Epaiketa salatzeko mobilizazioa, Gasteizen. ©JAIZKI FONTANEDA / FOKU

Zortzina urteko eskea berriz Barbado eta Zelaiaren aurka

Berria

Fiskalak zigor eskaerari eutsi dio Espainiako Auzitegi Nazionalean. Epaiketa gaur amaituko da, Madrilen

Fina Lizeranzu eta Manu Cabacas, Iñigo Cabacasen gurasoak, atzo, Jone Goirizelaia abokatuarekin batera. ©M. RAMIREZ / FOKU

Manu Cabacas: «Jipoituta eta umiliatuta sentitzen gara»

Maite Asensio Lozano

Espainiako Auzitegi Gorenak lehen epaia berretsi eta gero, NBE Nazio Batuen Erakundera joko du Iñigo Cabacasen familiak, «justizia bila»

Atzoko eztabaida eta bozketaren une bat, Nafarroako Parlamentuan. ©Iñigo Uriz / FOKU

Presoak hurreratzearen alde egin du Nafarroako Parlamentuak

Joxerra Senar

Geroa Baik, EH Bilduk, Ahal Duguk eta Ezkerrak aurkeztu dute mozioa, eta PSNk bat egin du. Espainiako Gobernuari bi eskaera egin dizkiote

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.