Koronabirusa

Normaltasunez irekiko dituzte hondartzak Lapurdi kostaldean

Asteartean bilduko da Eric Spitz prefeta zortzi herrietako auzapezekin. Hondartzen eta bainurako eremuen «erabilera arduratsua» eskatu dute Jaurlaritzak eta Nafarroako Gobernuak

Ekhi Erremundegi Beloki -

2020ko maiatzak 30

Heldu den astetik aitzina «normaltasunez» ibiltzen ahalko da Lapurdi kostaldeko hondartzetan. Hala jakinarazi du Eric Spitz Pirinio Atlantikoetako prefetak, konfinamendutik ateratzeko neurriak zehazteko egin duen prentsaurrekoan. Asteartean bilduko da Lapurdi kostaldeko zortzi herrietako auzapezekin, eta horiek hondartzak irekitzeko euren kudeaketa plana aurkeztuko diote; ondotik emanen du baimen ofiziala. «Formalitate bat», prefetaren hitzetan. «Azken asteetan askoz ere egoera zailagoa kudeatu behar izan dute».

Orain dela bi aste eman zuen hondartzak modu «dinamikoan» irekitzeko baimena Spitz prefetak. Paseatu, bainatu edo kirola egiteko aukera bazen, baina egonean egotekoa, ez. Astearteko bilkuratik landa, uretan bainatzeaz gain, oihalarekin hondarretan egoteko baimena ere izanen da, beti bere urruntze fisikoa atxikitzen bada. Azken asteetan, herriek kudeatu dituzte hondartzetako sorospen zerbitzuak; ondoko egunetan, zerbitzu horiek poliziak eta jendarmeriak indartuko ditu.

Bizkaiko eta Gipuzkoako kostaldean, tokian toki zehaztu dituzte hondartzak irekitzeko baldintzak. Herri batzuetan, hondartzetarako sarbidea mugatzea erabaki dute, edukiera gainditu ez dezaten. Eusko Jaurlaritzak erabiltzaileei eskatu zien hondartzen «erabilera arduratsua» egiteko atzo. Hondartzak kudeatzeaz arduratzen diren erakundeei lehendik emandako gomendioak gogorarazi zizkien Osasun Sailak: hondartzen edukiera kontrolatzea, egonaldi motzak planifikatzea, eta araudi berezia ezartzea marea igotzen denerako.

Orain, horiei gehitu die, orain arte Lapurdi kostaldean bezala, hondartzen «erabilera dinamikoa» sustatzeko gomendioa; Jaurlaritzaren iritziz, hondartzak paseatzeko, bainatzeko edo uretako jarduerak egiteko soilik erabiltzea litzateke onena. Gainera, jakinarazi du hondarretan ere derrigorrezkoa dela maskararen erabilera, bi metroko tartea gorde ezin den lekuetan. Bizkaiko hainbat hondartzatan hasi dira jada egonean egotea debekatzen.

Lakuak eta urtegiak

Ekainaren 13an hasiko da Arabako Garaio eta Landa «hondartzetan» udako denboraldia. Arabako Foru Aldundiak ez du bertan egoteko gehienezko denbora mugarik ezarriko, baina, bainu «motzak» hartzea gomendatu du aglomerazioak saihesteko. Gainera, jende pilaketak galarazteko Garaioko aparkalekuaren edukiera erdira murriztuko dute. Aldundiak oroitarazi du ezinbertzekoa dela osasun eta higiene neurriak betetzea. Gaurtik aitzinera, ertzainak eta miñoiak egonen dira bi «hondartzetan» jende kopurua eta segurtasun distantziak errespetatzen direla kontrolatzen.

Nafarroako Gobernuak aste hasieran eman zituen bainu eremuak erabiltzeko baldintzak: bizikideak ez badira, gehienez ere hamabost pertsonako taldeak elkartu daitezke, urruntze fisikoa eta babes neurriak errespetatuz; egoteko lekuetan, bi metroko perimetroa atxiki behar da; haurrentzako parkeak edota uretako jolasak erabiltzea debekatua da. «Arduraz» jokatzeko eskatu dute, eta osasun arloko agintariek ezarritako gomendio eta neurriak betetzeko agindu dute.

Lapurdin, Senpereko lakua irekitzeko baimena eman du prefetak, babes neurriak errespetatuta.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Santos Indurain kontseilaria prentaurreko batean, artxiboko irudian. ©Jesus Diges/EFE

324 kasu atzeman dituzte Hego Euskal Herrian

Berria

Kasuen beherakada orokorra izan da herrialde guztietan: Araban 44 kasu detektatu dituzte (-31); Bizkaian, 180 (-31); Gipuzkoan, 35 (-29); eta Nafarroan, 59 (-87). Nafarroako Gobernuak ez du neurri orokorrik ezarriko oraingoz. «Atzokoa ez zen alarma guztiak pizteko modukoa, eta gaurkoa ez da kriskitinak jotzekoa», adierazi du Santos Indurain Osasun kontseilariak.

Zahar etxe bateko egoiliarrak paseoan, artxiboko irudian. ©Marisol Ramirez/FOKU

Donostiako zahar etxe bateko egoiliar batek positibo eman du

Berria

Zahar etxe bereko bi langile ere kutsaturik daude.

Gizon bat PCR proba egiten, Donostian. ©Gorka Rubio / FOKU

Hogei milioi koronabirus kasu baino gehiago detektatu dituzte mundu osoan

Oihane Puertas Ramirez

COVID-19a 188 herrialdetara iritsi da, eta 736.000 lagun baino gehiago hil ditu.

Nafarroako osasun langileak PCR probak egiteko prest, artxiboko irudi batean. ©Jagoba Manterola/FOKU

Agerraldi bat detektatu dute Murillo el Fruto eta Zarrakaztelu inguruan

Berria

30 positibo atzeman dituzte; gehienak, laborarien artean.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna