Albistea entzun

Trafiko lege berriak arauak zorroztu ditu, eta isun gehiago jaso

Espainiako Kongresuan onartu dute erreforma. Besteak beste, sakelakoen eta radar detektagailuen erabilera zigortuko dute
Patineteetan kaskoa eraman beharko da aurrerantzean.
Patineteetan kaskoa eraman beharko da aurrerantzean. ARITZ LOIOLA / FOKU Tamaina handiagoan ikusi

Unai Etxenausia -

2021eko urriak 1

Espainiako Diputatuen Kongresuak zirkulazio arauen erreforma onartu zuen atzo arratsaldean: azken oniritzia eman zion Trafikoaren, Zirkulazioaren eta Bide Segurtasunaren Legeari. Erreformaren xede nagusia da puntuak kentzen dituzten arau hausteak berrikustea, legea gaur egungo gidatze eta zirkulazio eredura eguneratzea, eta zigorrak bete ondoren hasierako puntu kopurua berreskuratzeko igaro behar den epea bi urtean ezartzea. Oro har, arauak zorroztu ditu erreformak, eta isun gehiago jartzea aurreikusi du, batez ere sakelako telefonoen, radar detektagailuen eta patineteen erabilerari lotuta.

Aldaketa deigarrienetako bat errepide arruntetan gertatuko da: autoek eta motozikletek, beste ibilgailu bat aurreratzean, ezin izango dute berezko abiadura hogei kilometro orduan baino gehiago handitu. Hala, Europako Batasunean errepide arruntetan dauden abiadura mugen araudiarekin bat egingo du lege berriak.

Telefonoaren erabilerarekin zerikusia daukan artikuluan ere egin dituzte aldaketak. Sakelakoa eskuan izanez gero, orain arte bezala gidabaimeneko hiru puntu kendu beharrean, sei puntu kenduko dituzte legea indarrean jartzen denetik aurrera. Bestalde, gidaria sakelakoa erabiltzen ari bada, baina eskuetan ez badauka, 200 euroko isuna jarri eta hiru puntu kenduko dizkiote.

Orain arte zigortuta zegoen radarren detektagailuak erabiltzea, baita ibilgailuan inhibizio sistemak erabiltzea eta edukitzea ere, radarren funtzionamendua oztopatzen dutelako. Gailu horiek erabiltzen dituzten gidariek 500 euroko isuna ordaindu beharko dute, eta gidabaimenean hiru puntu galduko dituzte; eta erreforma indarrean jartzean, ibilgailuaren barruan radar mugikorreko detektagailu bat eramatea bera ere zigortu ahal izango da, nahiz eta itzalita eduki.

Indarrean sartuko den beste arau bat patinete elektrikoekin eta antzeko ibilgailuekin lotuta dago: nahitaez erabili beharko da kaskoa, salbuespenik gabe. Gainera, ibilgailu horietako bat erabiltzen den bitartean ezin izango da entzungailurik eraman, ezta sakelakoa erabili ere. Erabiltzaileek 200 eurora arteko isunei aurre egin beharko diete arau hori betetzen ez badute.

Ibilgailu motordunetan ere segurtasun uhala, haurrei eusteko sistemak eta bestelako babes elementuak ez erabiltzeagatik edo gaizki erabiltzeagatik, hiru puntu kendu beharrean, lau kenduko dituzte lege berriarekin.

Era berean, ibilgailuen kutsadura murrizteko asmoz aldaketak egingo ditu erreformak. Adibidez, zigorra ezarri ahal izango zaie ibilgailuaren motorra beharrik gabe piztua duten gidariei. Kasu horietan, zenbait udal dagoeneko ari dira isunak jartzen, baina lege berriak estaldura legala emango die udal ordenantzetan erregistratutako zehapen horiei. Kasu horietan isuna 100 eurokoa da.

Puntuak berreskuratzea

Bestetik, orain arte, galdutako puntuak berreskuratzeko, gidariek bi urte behar izaten zituzten arau hauste larrien kasuan, eta hiru urtekoa arau hauste oso larrien kasuan. Erreformarekin bi urtekoa izango da beti. Beraz, arau hauste larri batengatik puntuak galdu dituztenek puntu guztiak —hamabi— berreskuratuko dituzte bi urte pasatu ondoren, legea indarrean sartzen denean. Lege berria aldizkari ofizialean argitaratu eta hiru hilabetera hasiko dira zigor berriak ezartzen.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Maria Txibite lehendakaria eta Santos Indurain Osasun kontseilaria. ©JESUS DIGES / EFE

Sindikatu Medikoak 48 ordutan erantzunen dio Osasunbidearen eskaintzari

Ion Orzaiz

Gobernuak eta medikuen elkarte ultrakontserbadoreak akordio baten oinarriak finkatu zituzten atzo. Bertan behera gera daiteke otsailaren 1eko greba deialdia.

Ikasbidea ikastola, Duran ©Irekia

Ikasbidea ikastetxeak hotzari aurre egiteko konponbide iraunkor bat eskatu du

Irati Urdalleta Lete

Azaldu dutenez, arazoak dituzte ikastetxeko galdararekin, baina Eusko Jaurlaritzak esan die ez dutela uda baino lehen konponduko. Salatu dute ikasgeletan hamahiru edo hamalau gradu izan dituztela.

'Aita Mari' ontziak Mediterraneoan aurkitutako migratzaileen ontzi baten erreskatea, artxiboko irudia. ©Itsas Salbamendu Humanitarioa

'Aita Mari' ontziari espediente bat ireki diote, ia milioi bat euroko isunekoa

Isabel Jaurena - Edurne Begiristain

2020an Palermon (Sizilia, Italia) gertatu ziren ekintza batzuen baitakoa da zigorra. Aita Mari-k alegazioak aurkeztuko ditu.

Saridun guztiak, gaur arratsaldean ©berria

Azterketak Euskaraz taldeari eman diote kanpaina onenaren Argia saria

Irati Urdalleta Lete

'Karpeta Urdinak' dokumentalarentzat, Zugazart tirarentzat, '(Min)bizi' podcastarentzat, Euskal Mastodon komunitatearentzat eta Oihana Goirieenarentzat izan dira gainerako Argia sariak.

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.