Albistea entzun

Ahanztura onkologikoa arautzeko lehen pausoa eman dute Hegoaldean

Gaurtik aurrera minbizia gainditu dutenak ez dituzte diskriminatuko gidabaimena berritzean
Pedro Sanchez, aurreko astean, minbiziaren aurkako hainbat elkartetako ordezkariekin bilduta.
Pedro Sanchez, aurreko astean, minbiziaren aurkako hainbat elkartetako ordezkariekin bilduta. B. PUIG DE LA BELLACASA / EFE Tamaina handiagoan ikusi

Mikel Elkoroberezibar Beloki -

2023ko maiatzak 27

Minbizia pairatu duten pertsonek diskriminazio ugari jasan behar izaten dituzte sendatu eta gero ere: gidatzeko baimena berritzean, banku batean kreditu bat eskatzean eta aseguru bat kontratatzean, gainerako herritarrei baino baldintza gogorragoak ezartzen dizkiete. Minbiziaren aurka borrokan dabiltzan elkarteek urte asko daramatzate aldarrikatzen erakundeek ahanztura onkologikorako eskubidea bermatu behar dutela, hau da, pertsonek ezin dutela inolako diskriminaziorik izan minbizia pairatzeagatik. Gaur, lehen pausoa eman dute Hego Euskal Herrian eskubide hori arautzeko bidean. Gaurtik aurrera, minbizia jasan duten lagunek gainerakoen eskubide eta betebehar berak izango dituzte gidatzeko baimena berritzeko orduan.

Izan ere, gaur sartuko da indarrean Espainiako Gobernuak Gidarien Araudi Orokorrari egin dion erreforma; horren bidez, ahanztura onkologikorako eskubidea «bermatuko» diete gidatzeko baimena berritu nahi dutenei. Orain arte, minbizia pasatu duten pertsonek hiru, lau edota bost urtetik behin berritu behar izaten zuten autoak gidatzeko baimena; haien adinari zegokiona baino maizago kasu askotan. Espainiako Gobernuko Presidentetza Ministerioaren arabera, «oinarririk gabeko diskriminazio bat» zen hori. Gidarien Araudi Orokorraren erreformarekin, minbizia pasatu duten herritarrek gainerako herritarren eskubide berak izango dituzte gidabaimena berritzeko: haien adinari dagokion maiztasuna izango da berritzeko irizpide bakarra.

Hala ere, bi baldintza bete beharko dituzte. Batetik, DGT Espainiako Trafiko Zuzendaritza Nagusiak ulertuko du pertsona batek minbizia gainditu duela hiru urtez ez badu gaixotasunaren inolako zantzurik izan. Bestetik, sendagile baten «aldeko txostena» aurkeztu beharko dute herritar horiek; pazienteek minbizia gainditu dutela ziurtatu beharko dute medikuek hor.

Maiatzaren 13an iragarri zuen erabakia Pedro Sanchezek, Espainiako Gobernuko presidenteak, Sevillan (Espainia) PSOEk udal hauteskundeen harira egin zuen ekitaldi politiko batean. Ez zuen soilik iragarri gidatzeko baimena berritzen dutenei ahanztura onkologikorako eskubidea «bermatuko» dietenik. Harago joan zen: «Minbizia gainditu dutenak ez dituzte diskriminatuko hipoteka bat sinatzean, kreditu bat eskatzean edo aseguru pribatu bat eskuratzean». Esan zuen ez zela «iragarpen huts bat», baizik eta «errealitatea» izango dela ekainean.

Izan ere, Espainiako Diputatuen Kongresuak apirilaren 27an onartu zuen Berezoen Arretaren Legea, eta ekainean da Senatutik igarotzekoa. Ahanztura onkologikorako eskubidearekin lotutako gainerako neurriak PSOEk aurkeztutako zuzenketa batzuen bidez txertatuko dituzte lege horretan, eta, aurreikuspen guztien arabera, aise onartuko du goi ganberak. Beraz, ekainaren amaiera baino lehen sartuko lirateke indarrean neurri horiek.

Helburua ahanztura onkologikorako eskubidea «bermatzea» izango da, herritarrek bankuekin eta aseguru etxeekin dituzten harremanetan. Izan ere, minbizia gainditu duten herritarrek haien historia medikua erakutsi behar izaten diete bankuei hipoteka bat eta bestelako mailegu eta kredituak eskatu ahal izateko. Gauza bera egin behar izaten dute aseguru etxeetan. Minbizia pasatua izateagatik, interes handiagoak ordainarazten dizkiete. Diskriminazio horiek bertan behera utziko lituzkete neurri berriek.

Asko balio du irakurri duzun albiste/artikulu honek. Talde baten lanaren emaitza da.

Albiste hau zuri helarazteko eta talde honek bere lana baldintza egokietan egin dezan, BERRIAk ezinbestekoa du zure sostengua.

Zure babes ekonomikoarekin, aldi hau kontatzeko funtzioa betetzen jarraitu nahi dugu: kazetaritza konprometitu, kalitatezko eta independentea egiten.

Albiste gehiago

 ©Bob Edme

Mixel Oronoz euskaltzalea zendu da

Ekhi Erremundegi Beloki

Euskal Konfederazioko lehendakari eta bozeramaile izan zen urteetan. 88 urte zituen

Eraso matxisten aurkako elkarretaratze bat Iruñean ©Jagoba Manterola/ Foku

22 urteko kartzela zigorra ezarri diote gizon bati, bi adingaberi sexu abusuak egiteagatik

Berria

Nafarroako Justizia Auzitegi Nagusiaren ustez, biktimek jasandako sexu eraso jarraituan larderia egon zen, etxean jasandako «zapalkuntzagatik». Aurrez epaitegiek ezarritako zigorra urtebete eta hiru hilabete handitu dio.

ELAk eta LABek gaur goizean egindako agerraldia, Gasteizen. ©Endika Portillo/FOKU

Zortzi greba egunera deitu dute Arabako zahar etxe pribatuetan

Maixa Utrera Puelles

ELA eta LAB sindikatuek deitu dute lanuzteetara: urrian, azaroan eta abenduan izango dira. Araban «hitzarmen duin» bat ezartzea dute helburu, langileen lan baldintzak eta soldatak hobetu daitezen.

Lizarrako Garcia Orcoyen ospitalea. ©IÑIGO URIZ / FOKU

Estellerriko osasun publikoa «desegiten» ari direla salatu du LABek

Ion Orzaiz

Sindikatuaren ustez, Garcia Orkoien ospitaleko Ginekologia eta Obstetrizia zerbitzua itxi izanak agerian utzi du arduradunen «utzikeria»

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoari esker, gure funtzioa betetzen jarraituko dugu egunero:
jendearen galdera eta kezkekin bat egingo duen kazetaritza bat egiten.