Ontzat jo dute aitatasun baimen berrien dekretua tramitatzea
Harrabots handia eragin du Espainiako Gobernuak legealdia amaitzear aitatasun baimenak luzatzeko asmoz onetsi duen dekretuak, eta Ciudadanos alderdia horren tramitatzea eragozten saiatu da; dekretu hori onesteko aukeratutako modua Konstituzioaren aurka egitea dakarrela argudiatu du. Kongresuko zerbitzu juridikoek, ordea, dekretua tramitatzeko eragozpenik ez dela ebatzi dute txosten batean. Bere bidea egingo du, beraz: Diputazio Iraunkorrean. Izan ere, Espainiako Kongresurako hauteskundeak gainean dira, parlamentua deseginda dago, eta halakoetan erakunde horrek hartzen du tramitatzeen ardura. Dekretu berriaren asmoa da aitatasun baimenak zortzi astera luzatzea. Ciudadanosi kritikak egin dizkiote egunotan hainbat sektoretatik, tramitatzea eragozteko ahaleginekin baimenen luzatzearen aurka dagoela iritzita. Ignacio Prendes parlamentariak, ordea, prozedurari buruzko zalantzak zituztela esan du, eta horiek «argituta» aurrera egin ahal izango dela orain. PSOEk eta Podemosek eutsi egin diete kritikei.
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.