Albistea entzun

UEFAn eskaera. Bazen garaia!

Iñigo Santxo eta Martxel Toledo - ESAITeko abokatu eta koordinatzaile ohiak

2021eko urtarrilak 5

Inor gutxik jar dezake zalantzan euskal selekzioaren ofizialtasuna FIFAn eta UEFAn eskatzeko egungoa baino garai hobeagoak egon direla gurean; batetik, erakunde hauen estatutuek aukera hori aurreikusten zutelako, eta, bestetik, ofizialtasunaren aldarrikapenak jendartean oihartzun zabalagoa izan edota euskal kirolarien artean inplikazioa handiago eta zuzenagoa zelako. Baina orain, hogei urte pasatu ondoren egin dute. Bazen garaia!

Euskal Kirol Federazio batek nazioarteko erakundeetan —kasu honetan FIFAn eta UEFAn— sarrera eskatu izana ikaragarrizko aurrerapausoa da, zinez aurrekari garrantzitsua markatzen duelako. Maila honetako jauzi bat gauzatzean, bestalde, egokia izaten da atzetik egindakoak baloratzea, aurrera begirakoak zehaztu ahal izateko.

1995ean sortu zen ESAIT, eta ia hogei urte eman ditu ofizialtasuna aldarrikatzen. Hori lortzeko, beti izan du argi nazioarteko erakunde horietan eskaera gauzatzea ezinbestekoa zela. Eta 1998tik aurrera, behin baino gehiagotan proposatu diogu Jaurlaritzari eskabide hori gauzatzea, une egokia zelako Futboleko Federazioak UEFAn sarrera eskatzeko, Euskadin kirolaren gainean eskuduntza osoa izanik, UEFAren orduko estatutuetan oinarrituta, sarrera erabat bideragarria zelako. Une hartan ez zen honakoa gauzatu, gehienbat geroago Kirol Zuzendaria izan zenak jarri zituen oztopo eta trabak izan zirela medio, eta aitzina Lizarra Garazikoa zapuztu egin zelako. Tamalez, aukera galdua izan zen, eskabidea une hartan egin izan balitz, orain Gibraltarrekin batera Euskadiko Futbol Federazioa UEFA barruan egongo litzatekeelako eta, ondorioz, euskal futbol selekzioak nazioarteko txapelketa ofizialak jokatu ahal izango zituelako. Gibraltarrek sarrera eskatu eta gero, 2001ean, UEFAk estatutuak aldatu zituen —Espainiako futbol federazioak proposatuta, Euskal Herria, Katalunia eta besterekin gerta zitekeena aurreikusi zuenean—, UEFAn sartzeko ukanbehar gisa NBEk estatu independente gisa aitorturiko baten kirol federazioa izatea galdatuz. Orain erruak bota eta elkar seinalatzeko unea ez den arren, iragana beti hartu behar da aintzat, geroari begirako urratsetan asmatu ahal izateko.

Nazioarteko federazio batean sartu ahal izateko, bi fase garrantzitsu daude: lehena barneko fasea da, non sarbidea eskatuko duen federazio nazionalak bere erabakia estatutuen arabera dagokion organoan legez hartu behar duen. Horren ostean, akordio hori nazioarteko federazioari eskabide batekin adierazi beharko dio. Barneko fase hau erabat burutu du Euskadiko Federazioak.

Bigarren fasea onarpenarena izango da. Nazioarteko federazioak eskabidea jaso eta aztertu behar du, eta betebehar formal guztiak ondo gauzatuta daudela egiaztatuta, hortik aurrera federazio horren asanbladak erabakia hartu beharko du, zuzendutako eskabide hori ontzat jo ala errefusatzeko, muga bakarrak bazkideen borondatea eta Suitzako legedia izango direlarik.

Fase honetan berebiziko garrantzia hartzen dute lan diplomatikoak eta politikoak. Zentzu horretan, Espainiako Federazioarekin balizko akordio bat onuragarria izango da, nazioarteko lehiaketetan Euskal Selekzioaren presentzia lehiakorra bermatuko badu, eta horri begira ezinbestekoa da ofizialtasunaren alde Madrilgo Kongresuan dauden diputatu guztiek talde berean jokatzea, Euskal Federazioarekin koordinatuta.

Era berean, argumentarioa are gehiago indartze aldera, gai honen gainean Eusko Legebiltzarrean ez-legezko ekimenen bat onuragarria izan liteke, dagoen adostasun politikoa esanbidez islatuko lukeelako.

Erronka honek duen tamaina kontuan hartzen badugu, bistan da eragile guztiek —Jaurlaritzak, futbol jokalari profesionalek, federazioak, federatuek, klubek, alderdi politikoek eta gizarte-eragileek— batera jokatzea ezinbestekoa dela, desio dugun helmugara heldu ahal izateko.

Futbola oraingoan aitzindaria izan da bigarren fase hau irekitzen, baina EAEn baditugu beste 48 kirol federazio gehiago, eta hauetariko askok euren diziplinetan, gaur-gaurkoz, estatutu erabat desberdinak dituzten nazioarteko federazio desberdinetan sartzeko aukera dexente dituzte.

Beraz, partida hasita dago, eta irabazi nahi badugu, elkarlana inoiz baino garrantzitsuagoa da. Hel diezaiogun, bada!

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©BERRIA

Garai konplexuei aurre egiteko kazetaritza bat

Beatriz Zabalondo - BERRIA Taldeko lehendakaria / Martxelo Otamendi - BERRIAko zuzendaria

Iaz BERRIA Taldeak egindakoaren errepasoa duzu hau. Kazetaritza da gure eginkizuna, euskarazko kalitateko kazetaritza; erreferente informatiboa izatea helburu. Beraz, hortik hasi dugu errepasoa, gero arlo ekonomikoari, komunitateari eta erronka berriei leku egiteko.

Irautea iraultzea denean

Estitxu Garai, Naiara Pinedo eta Zuriñe Rodriguez

Zure ahotsa errazago zapaltzea, moztea. Ostean datorren gizonak zure iritzia gutxiestea. Gizonen maiztasuna handiagoa izatea. Gizonak finkoak izatea, zu aldakorra. Mahaiko emakume bakarra izatea naturalizatzera iristea. Zure hitzei ez entzunarena egitea, beti euren artean elkarri erreferentziak egitea.

Zuretzat bihotzez, Elizabeth Hadley
Ondoeza

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.