Albistea entzun

Amaia Zubiriak jasoko du Adarra saria Musikaren Europako Egunean

Kantari ibilbidean lagun izan dituen musikariek parte hartuko dute Viktoria Eugeniako oholtzan
Amaia Zubiria, Viktoria Eugenia antzokiko Foyer aretoan.
Amaia Zubiria, Viktoria Eugenia antzokiko Foyer aretoan. GORKA RUBIO / FOKU Tamaina handiagoan ikusi

Gorka Arrese -

2021eko apirilak 28 - Donostia

Amaia Zubiriarentzat izango da 2021eko Adarra saria, Donostiako Udalak urtero ematen duena ekainaren 21ean, Musikaren Europako Egunean, Viktoria Eugenia antzokian. «Euskal musikaren ordezkari garrantzitsuenetako bat da Amaia Zubiria», adierazi du Donostia Kultura erakundearen aholku batzordeak, Jose Joakin Forcada, Auria Etxeandia eta Esther Fernandinoren artean osatuak. «Aparteko gaitasuna duen kantaria eta musikaria da, kantu tradizionalen gaurkotzailea». Egun horretan Zubiriak eskainiko duen kontzerturako sarrerak salgai dira dagoeneko.

Zortzigarren aldia da Adarra saria ematen dutela. Mikel Laboarentzat izan zen lehendabizikoa, eta hurrengo urteetan jaso zuten Ruper Ordorikak, Benito Lertxundik, Fermin Muguruzak, Anari Alberdik, Berri Txarrak taldeak eta iaz Kepa Junkerak.

«Benito Lertxundik esnatu ninduen ni euskal kantagintzara», kontatu du Amaia Zubiriak Viktoria Eugenia antzokiko Foyer aretoan, Olatz Beobide aktorearekin solasean ari den bitartean. «16 urte nituen nik, eta Benitok, bost gehiago. Abesti lehiaketa batera joan nintzen ezkutuan, etxean ezer esan gabe, Donostiako Arte Ederrak teatrora [1963an]. Han aditu nuen Benito, erdaraz kantatzen aurrena eta gero euskaraz. Orduan esnatu nintzen». Irratian entzuten zituen abestiak ikasita kantatzen zuen Zubiriak sariketetan: espainolak, italiarrak, kubatar bat ere bai. «Baina Benito euskaraz abesten entzundakoan dena aldatu zen niretzat. Etxean gezurra esan, zinemara nindoala edo beste edozer gauza, eta trenez eta oinez joaten nintzen Benitok kantatzen zuen herrietara: Lasartera, Usurbilera, Oriora».

Ibilbide luzea egin du Zubiriak harrezkero. Txomin Artolarekin bat egin zuen eta Haizea taldea osatu zuten. Haizea (1977) eta Hontz gaua (1979) diskoak eskaini zituzten. Ondoren, Pascal Gaigne ezagutu zuen, eta elkarrekin lanean hasi ziren 1983ko udan. Egun argi hartan (1985) eta Kolorez eta ametsez (1986) diskoak plazaratu zituzten, alde batetik; bestetik, zinemarako musika ondu zuten film hauentzat: Zergatik panpox (1985), Ander eta Yul (1988), Santa Kruz (1990), Loraldia (1990), Como tu quieras (1992). Eta berriro Artolarekin elkartu zen gero, Folk lore sorta bildumako hiru diskoak egiteko 1991-1993 urteetan.

Sei lan gehiago argitaratuak ditu Zubiriak. Horien artean dira Amonaren mengantza (1995), Haatik (2002), Nabil (2008) edo Amona mantangorri (2010).

Zubiriak bozkarioz jaso du orain Adarra saria. «Gustura nago. Kontraesanak ditut. Gaztetan ez genion kasurik egiten erakunde publikoek antolatutako ezeri. Guk lana eskatzen genuen, hori zen behar genuena. Eta ez dugu sekula omenaldirik izan, ezta nahi ere. Baina sari hau emango zidatela esan zidatenean, poz ikaragarria sentitu nuen; joan egin ziren aurreiritzi guztiak».

Musikak asko eman dio bizitzan: lagunak, pozak, maitasuna. «Oso azkar igaro dira 44 urte, lehen diskoa atera zenetik. Harrotasun pixka bat sentitzen dut, orain kantak entzun eta neronek ezagutzea polita da-eta. Beti saiatu naiz kantu atenporalak egiten, eta denborarekin ez dira alferrik galdu».

Musika lagun askorekin

Ekainaren 21ean, 19:00etan, Viktoria Eugenia antzokian jasoko du Adarra saria Zubiriak, brontzezko garaikur bat, Marijose Rekalde eskultoreak egina. Eta segidan kontzertua eskainiko du. «Eklektikoa izango da. Nire doinuak eta hitzak dituzten abestiak kantatuko ditut. Pieza bakoitzak nire une intimo bat kontatuko du».

Oholtzan musikari talde zabala izango du lagun: Pascal Gaigne, Karlos Gimenez, Angel Unzu, Iñaki Salvador, Aitor Furundarena, Ritxi Salaberria, Gonzalo Tejada, Luis Camino, Manu Gaigne... Eta beste zenbait kolaborazio ere bai: Maider Ansa, Jaione Olazabal, Matixa Otero, Francisco Herrero, Ainara Ortega, eta bere seme Edorta Amurua Zubiria.

«Bertsolariak ez dira faltako», esan du, nahiz eta argitu ez duen nor izango diren. «Erreferenteak dira bertsolariak niretzat. Oso zalea naiz, aditua ez izan arren. Bertsolaria nuen aita. Lotsatia, alkoholikoa. Ona zen bertsotan. Eta kantari dotorea zen ama». Kantu txapelketetan ezagututako abeslariak ere igoko dira oholtzara. «Oraindik ez dezaket esan nor, ezta ere zenbat, bat edo bi edo hiru».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Epaileak, Bizkaiko Bertsolari Txapelketa epaitzen. ©GORKA RUBIO / FOKU

Bertsogintzaren matematika

Miren Mujika Telleria

Hainbat faktorek egiten dute posible bertsolari txapelketa bat, eta faktore horien artean dago, noski, epailetza. Hogeita bat epaile arituko dira hasi berri den txapelketan bertso bakoitzari puntuazioa ematen. Zein da, baina, puntu horiek gora edo behera egiteko neurgailua?
Gozategi taldearen kontzertua, Donostiako Aste Nagusian. ©Gorka Rubio

30 urte, baina beti gazte

Maria Ortega Zubiate - Gipuzkoako Hitza

Gozategi taldea 30. urteurreneko biran ari da aurten, eta plazetako harrera «ikaragarria» izaten ari dela dio Asier Gozategi soinu jotzaileak. Bihar Urnietan joko dute, eta urriaren 15ean, Zarautzen.

 ©IRUNE IZQUIERDO

Erretzaile damutuen konpainia

Berria

Aingeru Epaltzak hirurogei urteen talaiara iristen ari den kazetari bat jarri du 'Erretzaile damutuen konpainia' eleberri berriaren ardatzean: Edu Saragueta. Komedia garratz eta erotikoa, gizarte nahasi baten erretratua eta, batez ere, nobela beltz petoa osatu du.

Piztu METAk hamabost proiektu hautatu ditu

Berria

Egitasmoak sustatzeko finantzaketa kolektiboa hasiko dute. Gipuzkoako aldundiak 70.000 euro jarriko ditu

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...