Hirurogei argazki musikatu

Hamar urterekin hasi zen Stuart MacDonald argazkiak ateratzen, eta, ordutik, kamera du bidelagun eta ofizio. Musika festibaletako argazkiak egiten eman ditu azken hogei urteak, eta, orain, urte horietan ateratako zenbait irudi aukeratu ditu Gasteizko Amarika aretoan erakusteko. Argazkilari baten soinuak du izena erakusketak, eta Dave Grohl, Taylor Hawkins, Juliette Lewis, Maika Makovski eta Iggy Pop dira protagonistak. MacDonaldek bizitako anekdoten testuek laguntzen dituzte argazkiak, eta horiek irakurtzera animatu du artistak publikoa: «Nire bizitza profesionalaren eta pertsonalaren parte diren irudiak eta artistak dira guztiak». Ekainaren 25era bitarte egongo dira ikusgai irudiok.

Horrez gain, erakusketa osatzen duten beste hainbat artxibo aukeratu ditu MacDonaldek Gasteizko Ignacio Aldekoa kultur etxean jartzeko. Erakusketara eraman dituenak baino txikiagoak dira tamainaz, baina artistaren ibilbidea ulertzen laguntzen dute. «Lehenengo pisuan, Azkena Rock festibalean aurten abestuko duten eta Jazz jaialdian jo zuten artisten argazkiak daude, baita festibaletan lan egiten dutenen argazkiak ere». Bigarrenak, bestalde, 2004 eta 2022 bitartean Azkena Rocken egindako irudiak biltzen ditu. Testurik ez dute alboan, baina QR bat dute guztiek, irudi bakoitzean agertzen den artista zein den asmatzeko. Artista gehien asmatzen duenak argazkilariak berak sinatutako irudi bat eta liburu sorta bat lortuko ditu. Uztailaren 31ra bitarte egongo da ikusgai.

Irudien aukeraketa egitea zaila izan da MacDonaldentzat, eta aitortu du inoiz ez dela erraza horrelako erakusketak prestatzea. «Oraingoan, behintzat, argi nuen zein artista jarri nahi nituen, haiekin harreman berezia dudalako, baina ez nekien bakoitzaren zein argazki hautatu». Behar bezalako kalitatea ez zutelako baztertu zituen batzuk, eta nahi baino zaharragoak zirelako beste asko. «Ezin dut, ordea, askoz gehiagorik aipatu; nire argazkiek beren kabuz hitz egiten dute».

Guztira, hirurogei argazki erakutsiko ditu artistak Argazkilari baten soinuak erakusketan. Horrez gain, Gasteizko San Francisco kalean, Apolo tabernan zehazki, Women to the front proiekturako atera zituen argazkiak ere izango dira ikusgai, eta, MacDonaldek berak adierazi duenez, horiek ikusteko «azken aukera» izango da. Urtebete eman zuen lan hori prestatzen, eta musikan aritzen diren emakumeei ikusgaitasuna emateko helburua du. «Horrekin amaitu nuenean, zerbait desberdina egiteko nahia sortu zitzaidan, eta horrela jaio zen Argazkilari baten soinuak».

Arabako Foru Aldundiak antolatu du erakusketa hori, eta xede nagusia izan da Gasteizko herritarrei musika gerturatzea, hain «bereziak» diren egunetan. Hilaren 9an hasiko da, hain zuzen, Azkena Rock jaialdia, eta hori izan da MacDonalden argazkiak erakusteko aitzakia nagusia. Ana del Val Kultur eta Kirol saileko diputatua: «Ez dugu kasualitatez aukeratu MacDonalden argazkiak erakusteko data». Gainera, erakusketa ez da rock festibalaren harira antolatu duten ekintza bakarra. Izan ere, ekainaren 14an, The Brontes taldeak kontzertu bat emango du Ignazio Aldekoa kultur etxeko kargalekuan, 19:30ean.