Albistea entzun

Azkeneko ahalegina, zailena

Bera Berak 34-28 galdu zuen Errumanian joanekoan, eta gaur kanporaketa irauli nahi du Donostian, Europako Ligan aurrera egiteko
Ainhoa Etxeberria, jaurtitzeko prest, joan den larunbatean Errumanian jokatutako joaneko partidan.
Ainhoa Etxeberria, jaurtitzeko prest, joan den larunbatean Errumanian jokatutako joaneko partidan. BERA BERA Tamaina handiagoan ikusi

Julen Etxeberria -

2021eko azaroak 20

Bera Berari partida bakarra falta zaio urtea bukatu aurretik. Azken ahalegina da, baina zailena ere bai. Donostiako taldeak sei golen aldeaz galdu zuen duela astebete, Errumanian, Ramnicu Valcearen aurka, Europako Ligako hirugarren kanporaketako joaneko partidan: 34-28. Beraz, kanporaketa irauli behar du itzulikoan ligaxkarako sailkatu nahi badu. Gaur da partida, arratsaldeko lauretan, Josean Gaska kiroldegian (ETB1).

Iraganak dio Bera Berak oso gutxitan egin dituela halako balentriak Europako lehiaketetan. Zortzi aldiz galdu du sei gol edo gehiagoren aldeaz joanekoa etxetik kanpo, eta horietatik behin bakarrik izan da gai kanporaketari buelta eman eta sailkatzeko. Duela zortzi urte izan zen, Errekopako final-zortzirenetan. Sekulakoa egin zuten donostiarrek orduko hartan: hamabi golengatik galdu zuten joanekoan Polonian, Vistal Laczpol Gdyniaren kontra (32-20), baina itzulikoan, etxean, alde berarengatik irabazi zuten (29-17), eta gol aldeari esker egin zuten aurrera. Oso noizean behin gertatzen dira halakoak, baina pasatzen dira, eta horri heldu behar diote.

Baita beste helduleku bati ere: joanekoan euren maila eman zutenean gai izan zirela Valceari nagusitzeko. Sei golen aldea izan zuten lehen zatian —1-7 eta 6-12—, baina bigarrengoan behera egin zuten nabarmen. Errumaniarren 5-1 defentsak eta Glibkoren eta Elghaouiren golek min handia egin zieten —hemezortzi sartu zituzten bien artean—. Errumaniarrak beste horrenbeste egiten ahaleginduko dira gaur, baina seguru Bera Berak prestatu duela zerbait horri aurre egiteko. Ikusteko dago lanak fruitua emango duen.

«Lehiatzea da lehen xedea»

Sei golen aldea da irauli beharrekoa, eta, Imanol Alvarezen arabera, «erronka zaila» da hori, baina «polita» aldi berean. Bera Berako entrenatzaileak garrantzi handia eman dio «pazientzia» izateari eta kontrako aldearekin «ez itsutzeari». Argi ditu lehentasunak: «Lehenbizi, lehiakorrak izan behar dugu; eta, gero, aurretik jarri, bizpahiru gol-edo. Hori eginez gero, edozer gerta daiteke. 60 minutuk askorako ematen dute. Parisen ikusi zen hori».

Horretarako, «ondo» aritu beharko dute: erasoan, «eraginkor», eta defentsan, «sendo». «Gogotsu» ikusten ditu jokalariak, eta «apur bat minduta» ere bai, lehen zatian ondo aritu ondoren bigarren zatian behera egin baitzuten. Zaleak animatu ditu: «Denon laguntzarekin, egun historikoa izan daiteke».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Realeko jokalariak Take Kuboren gola ospatzen, gaur, Cadizen (Espainia). ©Roman Rios / EFE

Realak Kuboren gol bati esker irabazi du Cadizen

Paulo Ostolaza

Txuri-urdinek gogor lan egin behar izan dute, baina japoniarrak 24. minutuan sartutako golak balio izan die. Debuta egin dute Brais Mendezek eta Momo Chok ere.

Orioko arraunlariak garaipena ospatzen, atzo, Ondarroan (Bizkaia). ©Aritz Loiola / Foku

Oriok hirugarren aldiz irabazi du Euskotren Liga

Berria

Hamalau ehuneneko eskasegatik irabazi du gaur Castro Urdialesen, eta denboraldiko hamargarren bandera astindu du. 

 ©ARITZ LOIOLA / FOKU

«Denboraldi hau niretzat azkena balitz bezala gozatuko dut»

Pettan Uralde

Hamalaugarren denboraldia du De Marcosek Athleticen, eta egunez egun gozatzeko ideiarekin ekin dio sasoi berriari. Guardiako jokalariak Europan kokatu du taldearen helburua, eta lortuko dutelakoan dago.
Hondarribia garaipen bat ospatzen, artxiboko irudi batean. ©Oskar Matxin Edesa / Foku

Hondarribiak irabazi du Castro Urdialesen, eta sailkapena estutu du

Berria

Pasa den asteburuko kolpeari buelta eman dio Ama Guadalupekoa-k. Urdaibaik bigarren amaitu du, eta ondo eutsi dio lidergoari.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.