'Izaro' eskulturari buruzko materialen erakusketa

Nestor Basterretxearen Izaro eskultura Eusko Legebiltzarreko ikur bihurtu da 1983. urteaz geroztik. Obra osatu aurrez eskultoreak egindako marrazkien eta estudioen erakusketa ipini zuten atzo Legebiltzarrean, argazkiz eta erreplikez lagunduta. «Bi tona airean, mundua pentsatzeko era ezberdinak defendatzearren»: halaxe definitu du Monika Basterretxeak, artistaren alabak, haritz egurrezko pieza handia. Bilboko Arte Ederren Museoak, gainera, sasoi hartan egindako beste zenbait obra ekarri ditu, Basterretxearen lanetan diseinu industrialak zeukan eraginaz ohartarazteko.