Albistea entzun

BEGIZ

Beti gazte

Haizea Barcenilla -

2019ko ekainak 11

Jakina da emakumeak nekez izaten garela besteen begietara pertsona helduak. Francoren garaietan, aitaren menpe egotetik senarraren eskuetara pasatzen ginen, egun batetik bestera egoera zibila aldatuz, baina ez mendekotasuna. Gaur egun, gazte izatetik atso izatera pasatzen gara, adinez mudatuz baina patriarkatuaren epaile begiradari ihes egin gabe. Adin aldaketa antinaturala da, biologikoki tarte handia baitago gaztetasunaren eta zahartzaroaren artean; baina emakumeon adina, biologikoa soilik beharrean, sinbolikoa ere bada.

Aipatu izan dut zein desberdin baloratzen den gaztetasuna gizon eta andrazkoetan. Gizonen kasuan, bikaintasunarekin eta jenialtasunarekin lotzen da, eta adin oso gazteari lotzen zaio; hogeita hamabostean jarriko nuke muga. Emakumeoi, ordea, asko luzatzen zaizkigu gaztetasuna eta horri lotutako ezaugarriak: esperientzia faltaren ordezko freskotasuna eta jakintzarik eza orekatuko duen lanerako gogoa. Adinaren heldutasuna onartzeak, finean, pentsamenduaren heldutasuna ere badakar, eta emakumeoi hori atxikitzea zaila dirudi: froga enpiriko garrantzitsua behar da halako estatusa eman ahal izateko (sari nazionalen bat gutxienez). Adin aurreratu batetik gora hasten zaizkigu heldutasuna eta jakintza onartzen, biologikoki gaztetzat jotzea irrigarri suertatzen hasten denean. Orduan pasatzen gara atsoak izatera (edo publikoki esperientzia eta ibilbide handiko emakumeak).

Horren guztiaren adibide, igandean, harriduraz irakurri nuen BERRIAn Beatriz Herraez Artiumeko zuzendariari egindako elkarrizketaren sarrera. Honela zioen: «Belaunaldi berriko olatuaren adibideetako bat da Beatriz Herraez (Gasteiz, 1974). Ezagutza eta trebetasun handiko gazteak dira [...] Aldeko dituzte ilusioa, gogoa eta energia, beste ezeren gainetik».

Okertzearen beldur, hemeroteka kontsultatu dut, baina ez dut Peio Agirre (1972) Veneziako Bienaleko komisario izendatzearen berrian «belaunaldi berri» edo «gaztetasunari» buruzko aipamenik topatu; ezta Xabier Gantzaraini (1975) 2015ean Kalostrako koordinatzaile lana hartu zueneko elkarrizketan (Herraezek orain baino bost urte gutxiago zituen orduan) bere ilusioari, gogoari eta energiari eginiko aipamenik ikusi. Egia da belaunaldiari ezagutza atxikitzen diola kazetariak, baina ilusioa, gogoa eta energia gailentzen dizkio gero.

Herraezen curriculum luze eta bikaina zerrendatzear egon naiz, baina ez da hori bidea: horren bidez, bere ahalmenaren gainean ezartzen den zalantza onartu eta erantzungo nuke. Bakarrik esango dut Herraez 45 urteko emakume heldua dela, zentzu guztietan. Ez da gaztetasunaren eta gogoaren erakuslea; jakintzan, ikerketan eta lan gogorrean oinarritutako esperientzia sendo eta sakonaren erakuslea da. Aitortu diezaiogun, merezi du eta.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

El Mono Habitado konpainiaren 'Lurtarrok' antzezlaneko pasarte bat. ©La Caja Gris

Gezurrik gabeko lan eszenikoak, 29. dFeria jaialdian

Andoni Imaz

Martxoaren 13tik 16ra, 28 konpainia arituko dira Donostian, eta 44 emanaldi egingo dituzte guztira. Dantza eta antzerki ikuskizunak dira gehienak, eta, aurten, zirkua ere izango da. Jaialdia «erreferente» bilakatu nahi dute Europan.

<em>Komedia madarikatua</em> antzezlana. ©HODEI TORRES

Gai sakonak, umorez landuak

Olatz Enzunza Mallona

Bilboko Pabiloi 6 Antzerki Laborategiko Gazte Konpainiak 'Komedia madarikatua' estreinatuko du gaur, areto horretan bertan. Antzezlanak drama eta komedia uztartuko ditu , eta gizarte gatazkak izango ditu hizpide, «modu komikoan, betiere»

Kristonak taldeko bost kideak, <em>Ahobetehortz</em> diskoa iragartzeko argazki batean. ©KRISTONAK TALDEA

Etsipenetik piztu dira

Olatz Enzunza Mallona

Kristonak taldeak aro berri bat abiatu du, 'Ahobetehortz' lanarekin. Eskean Kristo atzean utzi arren, taldearen betiko nortasunari eutsi diote. Bihar hasiko dute bira, Ondarroan
Rotterdamen eta gurean ez da faszinagarriagorik

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...