Albistea entzun

HITZ ETZANAK

Algara

Andoni Egaña -

2018ko uztailak 18

Badira barre-algara klase batzuk ulergaitzak. Horietako bat da hanka sartzeren bat egin duzularik sortzen zaizuna. Sartzen duzu hanka, ohartzen zara, eta ahaleginduarren menpean har ez dezakezun barre algara lelo batek egiten dizu ihes, errepikatuaren errepikatuz leloagoa are. Hanka sartzearen une berean gertatu ohi da gehienetan, baina badu atzerako efekturik ere. Badut adiskide bat bere matrimonio aspaldi apurtuaz mintzo denean, beti, edozein delarik ere pasadizoa, barre algara bera egiten duena. Babes mekanismoren bat izango da. «Egin dut, baina badakit. Ez naiz hain-hain leloa!».

Barre algara klase interesgarriagoa da autoritateak hanka sartzen duenean menpekoari sortzen zaion eutsiezin hori. Irakasle harroak arbelerako koskarekin estropezu egiten duenean beti izango da ikasleren bat barreari eutsi ezin izango diona. Menpekoaren mendeku txikia izaten da. «Zer uste zenuen hantuste horrek, zuk ez zenuela atzean zulorik?».

Espainiako irrati-telebista publikoaren zuzendaritza aldatzeko bozketan bi diputatuk hanka sartu zuten herenegun. Ez dakit lehen barre algara klaserik egingo zuten, oro har oso jende kokozgora izaten da hori eta. Menpeko asko barre algara atertu ezinda dabil. «Hori beste lanik ez eta, halare hanka sartu?».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...