Albistea entzun

EGUZKI EPELEAN

Barrez lehertu

Diego Pallés Lapuente -

2019ko abuztuak 10

Duela astebete AEBetan eskuin-muturreko gizonek arrazismoaren ikara-mezua odolez idatzi zuten egindako sarraskiekin. Hiltzaileetako batek 1.000 kilometroko bidaia egin omen zuen tiroketa Mexikoko mugan dagoen El Paso hirian egiteko; ez zen garrantzi gutxiko datua: tiroketa ostean poliziari adierazi zion bere asmoa «ahalik eta mexikar gehienen aurka tiro egitea» zela.

Bada, El Pasotik 500 kilometrora dagoen Tucson hiriak ere zeresana eman du azken egunotan. Bi hirien artean zenbait antzekotasun daude: Mexikoko mugatik gertu daude biak eta Tucsonen ere tiroketa politiko bat gertatu zen, 2011n. Iragan asteartean, Tucson santutegi-hiri izendatzeko lege prozeduran aurrerapauso garrantzitsua egin zuten bertako biztanleek. Santutegi-hiriak agiririk gabeko migratzaileak babesteko ekimen instituzionalak dira AEBetan. Bertako udal-gobernuek migratzaile horien deportazioak ekiditeko neurriak hartzen dituzte; adibidez, poliziei eta udal-langileei debeka diezaiekete jendeari haien lege-egoerari buruz galdetzea. Horrela, familiak sakabanatzea eragozten dute eta agiririk gabeko jendeak segurtasun handiagoarekin egin ditzake garrantzitsu diren hainbat jarduera, hala nola krimenak salatu, osasun-zerbitzu publikoa erabili edo seme-alabak eskolatu. AEBetako populazioaren erdia horrelako hirietan bizi da egun.

2015ean, Javier Marotoren kanpaina arrazistaren unerik gorenean, Miguel Angel Etxebarria PPko zinegotzi ohiak etorkinei eta diru-laguntzei buruzko hitzaldia eman zuen Gasteizen. Bertan, desinformazioa eta datu faltsuak lasai asko zabaldu ostean, publikoak irain arrazisten zaparrada ederra botatzeari ekin zion (etorkinak «animalia-aldra hutsa direla», «untxien pare ugaltzen direla»). Etxebarria jaunak ez zuen zirkinik egin horiek entzutean, arrazismo-agerraldi publiko hori naturaltasun osoz onartu zuten denek.

Tucson hirian, ordea, oso bestelako jarrera izan dute antzeko egoera batean. Santutegi-hiriaren gaiari buruzko udal-bilkura batean, Trumpen aldeko bi pertsona neurriaren aurka oihuka azaldu ziren; bildutako askok haien jarrera gaitzetsi zien espero bezala, baina gizon baten erreakzioa biralizatu egin da: barreari ezin eutsi eta algaraka hasi da arrazisten aurpegian. Ikuskizun ezin dibertigarriagotzat izan omen du haien supremazismoaren erakustaldia. Bere irri kutsakorrak munduari buelta eman dio #GreenShirtGuy traolari esker.

Autoritarismoari aurre egiteko, ez da bakarrik liderren kontura barre egin behar. Trumpekin mundu erdia saiatu da dagoeneko, ezer gutxi lortu gabe. Aldiz, lider hori legitimatzen duen herriari barre egitean, orduan bai, nazioaren salbatzailearen irudiaren oinarria erabat suntsi daiteke.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Hutsaren bahea
Arrosarioa
 ©BERRIA

Garai konplexuei aurre egiteko kazetaritza bat

Beatriz Zabalondo - BERRIA Taldeko lehendakaria / Martxelo Otamendi - BERRIAko zuzendaria

Iaz BERRIA Taldeak egindakoaren errepasoa duzu hau. Kazetaritza da gure eginkizuna, euskarazko kalitateko kazetaritza; erreferente informatiboa izatea helburu. Beraz, hortik hasi dugu errepasoa, gero arlo ekonomikoari, komunitateari eta erronka berriei leku egiteko.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...