BIRA

Arrakala

Onintza Enbeita -

2019ko irailak 7
Arabak, Bizkaiak eta Gipuzkoak osatzen omen dugun erkidegoko etxerik garestiena Donostian dago. Ez dakit barruan zer izango duen, baina, kanpoan ikusita, etxea baino ez da. Bere teilatu eta bere leiho, bere horma eta bere ate: etxe bat. Lau milioi eta ez dakit zenbat euro balio ei ditu etxeak eurotan. Ez dakit pikua zenbatekoa daukan, lehen zifra entzunda izoztuta geratu naiz. Izugarria iruditzen zait, lotsagarria eta etsigarria. Triziklo baten gainean munduari bira emateko moduko abiadura hartu dit barruak: ze gogo sortu zaidan etxe horri su emateko!

Gugandik ez oso urrun, bada kalean lo egiten duen jendea. Aspaldi ez dira telebistan asko agertzen, baina jakin badakigu oraindik ere kaleratzen dutela jendea etxeetatik. Alokairu sozialak ordaintzeko ere larri dabilen jendeak gure okindegi berean erosten du ogia, ahal duenean. Eta hara non, gugandik distantzia berdinera, lau milioi balio dituen etxe bat dagoen.

Ez dago euskal oasirik. Hemen ere arrakala ederra dago egunero lanera joaten garen jendearen eta lau milioiko etxea dutenen artean. Gero esango digute gaztetan antolatu behar dela zahartzaroa eta dirua aurreztea dela kontua. Hemen kapitalismorik ez balego bezala, hemen guztiok aukera berdinak izango bagenitu bezala.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna
S: