BIRA

Olioa

Onintza Enbeita -

2019ko martxoak 21
Itsasontzi bat lehertu zen Arroxela inguruan duela aste bi eskas. Hasieran, ez genuen inon ezer ikusi, eta, sare sozialetan zabaldutako mezuen ostean, informatiboetan agertu zen. Ontziak material arriskutsua zeraman, baina ez dago informazio zehatzik: kontenedoreak ur azalerako bidea egin dute itsasontzia hondoratu eta gero. Armadoreak hartu du haiek bildu eta lurrera eramateko ardura.

Orain, hegazti bat agertu da hilda; Hendaian. Gorpuaren ia hiru heren zeuden fuel olioz estalita. Ez da zipriztin soila izan, beraz. Olio asko egon da hegaztia uretaratzen saiatu den leku horretan. Gaur-bihar batek daki, baina hegaztia aurkitu eta lehen orduetan inork ez du aitortu Arroxelan gertatutako istripuaren ondorioa denik. Badaezpada ere, denak isilik. Eta orduan, bat larritu egiten da. Ze, hegazti hori ez bada Hendaiara heldu Arroxelan barrena, beste nonbaitetik iritsi da, eta beste nonbait horretan olioa dago. Fuel olio asko: gorputzaren %70 estaltzeko adina. Orduan, ia hobe da txori migraria lehertutako ontziaren ingurutik datorrela pentsatzea. Beste aukerek itsasoa olioz beteta dagoela pentsatzera eramaten baikaituzte. Eta okerrena da hori ere ez dela gezur osoa izango. Baina jarrai dezagun pentsatzen galiziarrak direla halako istripu batean engainatu zituzten bakarrak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna