Aditzen aldekoa naiz oso, diskurtsoa erabat substantiboetan oinarritzen den garaiotan. Enpatia, sinergia, elkarlan, lehiakortasun... hitzez beteriko txostenek atzera eragiten didate. Umetan ikasten zen akzioa adierazten duen esaldiaren zatia aditza dela. Substantiboz beteriko txosten bat lurrera ekarri eta abian jartzea baino lan zailagorik ez da. Paperean edo ahotan, nahiago dut «egin» asko aurkitu «ekimena» mordo bat topatu baino.
Muturrerako joera hartzen ere badakigu, ordea. Aditz berria asmatu behar derrigor euskararentzat, inguruko hizkuntzaren batean aditzez eta trinko adierazten dena trinko adierazteko geuk ere.
Hegaztien inguruko solasaldi guztiz interesgarria entzun berri dut irratiz. Ari zenak bazekien zertaz ari zen eta zeinentzat ari zen ere bai. Egoki jardun zuen. Oso egoki. Nire belarriak izango dira akaso errazegi mintzen direnak. Hegaztiak «eraztundu» egiten zituztela entzun bezain laster etorri zitzaidan gogora Koldo Mitxelena zena, zahartua ordurako, ezpainetan sasi-zigarroa dilindan, langabezia hitzaren aurka marmarka. Lanik eza behar omen zuen. Gazteleraz paro hitz bakarraz esaten zelako ez omen geneukan guk hitz bakarraz esan beharrik. Nik ere nahiago nuke hegan «eraztuna ipinita» egin...
HITZ ETZANAK
Hegan
Iruzkinak
Ez dago iruzkinik
Ordenatu