HITZ ETZANAK

Koilarak

Andoni Egaña -

2019ko martxoak 27
Bageneuzkan beste mila zeregin eta buruhauste, baina guri ere eragin egin zigun Uri Gellerrenak. Telebistan bi kate baino ez ziren garai hartan 20 milioi ikusle izan zituen programak. Jose María Iñigorekin azaldu zen pantailan, geldirik zeuden eskumuturrerako erlojuak eskuz ukitu gabe martxan ipiniz eta, batik bat, koilara bat buru-indar hutsez bigundu eta apurtuz. Ume edo nerabe ginen gehienok egin genuen proba etxean, lagunartean edo eskolan. Koilara askok egingo zuen ihes egun haietan sukaldeetako kaxoietatik. Guri, disimuluan indarka aritu arren, ez zitzaigun sekula ongi irten.

Egunotan izan dugu berriz Uri Gellerren berri. Theresa Mayk brexit-ari buruz duen iritzia aldatzea du orain helburu. Gutun bat idatzi zion nonbait, eta agintariak ez zion jaramonik egin. Horregatik, eta bere iritzia alda dezan, egunean bi aldiz kontzentratu eta telepatia bidezko erauntsitxoak bidaltzea proposatu du ilusionista israeldarrak. Ba omen du jarraitzailerik...

Lehen ere guk uste baino «politikoagoa» zen Uri Geller. Espainiako telebistan 1975eko irailaren 6an azaldu zen. Txiki, Otaegi eta FRAPekoen fusilamendua baino hiru aste lehenago. Franco hilzorian zela. Atentzio fokua desbideratzea da magiaren oinarri. Eta hori inork baino hobeto egin zuen.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna