BIRA

Futbola

Onintza Enbeita -

2019ko otsailak 1
San Mamesen ia berrogeita hamar mila lagun batu ziren asteazken iluntzean. Berez, horrek ez luke lehen orriko notizia izan behar: San Mamesen sarri antzean egoten da hainbeste jende. Kontua da jokoan ari zirenak emakumeak zirela. Normalean, gizonezkoen lehen mailako futbola ikustera joaten direnen kopurua berdindu zuen emakumeen lehen mailako futbola ikustera joan zen jendeak. Hori, zoritxarrez, nobedadea da oraindik. Eta zoritxarrez diot, halakoak azpimarratu beharrak normaltasunik eza islatzen duelako. Eta zoritxarrez diot, ez dudalako leku bakarrean soilik irakurri edo entzun, sarrerak oparitu egin zituztelako egon zela horrenbeste jende. Ez nago ados, eta kokoteraino nago gure izerdiari garrantzia nola kentzen zaion ikusteaz. Guztion zergekin ordainduta dago San Mamesen zati bat. Galdetu izan baligute, agian, gure diruarekin emakumeek jokatu dezatela eskatuko genuen, baina gehienetan gizonek jokatzen dute. Beraz, eztabaidagarria da zer oparitu dion nork eta nori. Ez dut gaizki ikusten sarrerak oparitzea; normaltasunaren alde egindako ekintza denean, behintzat. Bestalde, sarrera eta guzti ere, asko geratu ginen kanpoan. Beraz, pentsatzekoa da, sarrerarik oparitu ez balitz ere, San Mames bete samar egongo zela asteazkenean.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna