BIRA

Ordaina

Onintza Enbeita -

2019ko ekainak 4
Bilboren aldaketa noren alde egin den erakusten du Iberdrola dorreak. Langileen uri zikinetik aberatsen eta turisten hiri zurirako bidearen ikono printzipaletakoa da. Bizkaiko hiriburua paseatzeko lehen baino leku atseginagoa dela esaten digute, baina ezin dugu bidean galdutakoa ahaztu. Are oraindik, jakin dakigunean eraldaketa horretan nortzuei eta nork egin nahi izan dien mesede. Hor dago Iberdrola dorrea: 25 milioi euro ordaindu zituzten bilbotarrek dagoen lekuan egon dadin. Hori gutxi balitz legez, argindar enpresaren egoitza zaharra birkalifikatu, eta luxuzko etxebizitzak egin zituzten. Eta bilbotarrek, hala ere, beste guztion moduan, Iberdrolak eskaintzen dien argi indarra ordaindu egin behar dute: deskonturik gabe. Eta bilbotar gehienek, hala ere, ezin izango dituzte luxuzko etxebizitza horiek eskuratu. Eta bilbotar batzuek, hala ere, jarraituko dute esaten egin diren aldaketa guztiak guztion onerako izan direla.

Orain arteko mesedeak ahaztu egin dituzte dorrearen jabeek, ordea. Hogeita bosgarren solairua bisitariei irekiko diete, baina sarrera ordaindu egin beharko dute handik goitik botxoa ikusi nahi dutenek: bederatzi euro. Arin ahaztu dituzte bilbotarrek emandako milioiak. Bai ba, esaten zuen bada gure aitonak: ondo eginaren pagua, ate ondoan palua.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna