Albistea entzun

EGUZKI EPELEAN

Diplomazialari anarkista

Diego Pallés Lapuente -

2019ko abuztuak 24

Aspaldian irakurri nuen Fernando Pessoak 1922 urtean argitaratu zuen Bankari anarkista narrazio satiriko laburra. Bertako protagonista boterearen erakundeen kritiko zorrotza da, baina, asko hausnartu eta gero, borroka kolektiboa emantzipaziorako tresna efikaza dela ukatzen du. Ondorioz, bere askatasun pertsonala lortu nahian, bankari bihurtu eta dirua lortzeari ekiten dio buru-belarri. Kontraesan eta arrazoibide bihurriei buruzko kontakizun xelebre bezain interesgarria utzi zigun idazle portugaldarrak.

Bada, orain dela gutxi antzeko istorio bitxi baten berri izan nuen, baina oraingoan hezur-haragizko protagonistarekin. Carne Ross britaniarrak Pessoaren bankariaren kontrako ibilbidea egin zuen. Erresuma Batuko gobernuarentzat diplomazialari ibili zen hamahiru urtez, 2002 urtera arte. Irakeko gerraren atarian, NBEko Segurtasun Kontseiluan lanean ari zela konturatu zen ezin zuela munduko ministroen aurrean irribarre bat erakutsi eta haien zerbitzura jarduten jarraitu.

Apurka-apurka, estatuaren zerbitzari leial eta zintzo hori ohartu zen gobernuetako politikariak ez direla pertsona bereziki konpetente edo argiak, eta ezintasun handia dutela haien politikek dakartzaten ondorioak kontrolatzeko. Halere, jendearen aurrean munduko arazo guztiak konpontzeko gai balira bezala azaltzen dira beti: Estatuak bere existentzia beharrezkoa dela sinetsarazi behar dio jendeari, nahiz eta, Estatuaren interesak gizartearen interesekin bat egiten ez dutenean, jendearen kaltera jokatzeko eskrupulurik ez duen. Hortaz, herriaren antolakuntza mota espontaneoen aurka egiteko joera du, horrek alternatibak posible direla erakusten baitu. Lankidetza, elkartasuna, gizakiek erakuts dezaketen alderdirik onena ukatzeko prest dago, azkenaldian Mediterraneoko salbamendu-ontzietan ari direnei egindako jazarpenean ikus daitekeenez.

Zintzotasunagatik, bere lana utzi eta anarkismoaren defendatzaile publiko bilakatu da Ross. Askok kanpotik teorizatu duten hori berak bare-barnetik ikusi du: erakunde handiek eta liderrek beren boterea defendatzea lehenetsi eta gizartearen beldurrez abusatzen dute. Bere ustez, jendeak boterea, erabakitzeko eskubidea izango balu, inork baino hobeto azal lezake zein diren bere lehentasunak. Autonomia edo ahalduntzea gizakiaren berezko baliotzat du: soluzioak proposatzea hierarkiak ukatu gabe alferrikako kontua dela. Nire ustez, joera horri azken mendeetan anarkismoa esan bazaio ere, izan asko har lezakeen praktika edo bizi filosofia da. Eztabaida helburuetara mugatu bainoago, hori lortzeko bideetara zabaltzea komeni zaigu krisi garai honetan.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©BERRIA

Garai konplexuei aurre egiteko kazetaritza bat

Beatriz Zabalondo - Berria Taldeko lehendakaria / Martxelo Otamendi - BERRIAko zuzendaria

Iaz BERRIA Taldea egindakoaren errepasoa duzu hau. Kazetaritza da gure eginkizuna, euskarazko kalitateko kazetaritza; erreferente informatiboa izatea helburu. Beraz, hortik hasi dugu errepasoa, gero arlo ekonomikoari, komunitateari eta erronka berriei leku egiteko.

Irautea iraultzea denean

Estitxu Garai, Naiara Pinedo eta Zuriñe Rodriguez

Zure ahotsa errazago zapaltzea, moztea. Ostean datorren gizonak zure iritzia gutxiestea. Gizonen maiztasuna handiagoa izatea. Gizonak finkoak izatea, zu aldakorra. Mahaiko emakume bakarra izatea naturalizatzera iristea. Zure hitzei ez entzunarena egitea, beti euren artean elkarri erreferentziak egitea.

Zuretzat bihotzez, Elizabeth Hadley
Ondoeza

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...