Martins Licis telebistan ikusi nuenean, garai bateko emakume bizardunekin gogoratu nintzen. Ez daukat ezer gizon horren kontra, ojo! Ondo iruditzen zait genetikak eman dion ahala erakustea. Ezaugarri berezi guztiak ikuskizun bihurtzen ditugula iruditzen zait, ordea: munduko pertsonarik garaiena, txikiena, zaharrena... Berdin du nori esker daukagun boto eskubidea edo nori bururatu zitzaion piperrak kordetan lehortu eta saltsak egiteko erabiltzea. Horiek ez dira gauza arraroak dagoeneko. Guk nahi duguna da ikusi nola egiten duen beste batek guk egin ezin duguna, nola jaso dezakeen harri izugarria aste betean bakarrik entrenatuta. Imajinatu egin nahi dugu nola txikituko lituzkeen gure etsaiak.
Seguruenetik bizitza erraztu egingo dio Licisi hain indartsua izateak, baina hortik aurrera, dena da ikuskizuna. Azokara eramaten den piztia exotikoa. Behar dugu guk gauza bereziak ikustea, baina begira Altzoko handiari zer gertatu zitzaion: bera baino gehiago aberastu ziren bera hartuta hor zehar ibili ziren zenbait. Min bezalako bat egiten dit horretaz gogoratzeak eta oraindik ere gertatzen dela pentsatzeak. Agian ez zaio Licisi gertatuko, oxala, baina ez genuke ahaztu behar espektakuluak gorputzak behar dituen bezala, bihotzak txikitu egiten dituela.
BIRA
Gizonik indartsuena
Iruzkinak
Ez dago iruzkinik
Ordenatu
