BIRA
Gizon artea
Arrautzak baino ez ditu behar izan, baina eskatu, hartu eta ordaindu dituen bitartean sekulakoak esan ditu. Ez niri zuzenean, baina hitz bitik bat biraoa izan da. Ez dakit nire harridura igarri egin duen, edo hainbeste aldiz gauza bera entzun duelako justifikatu beharra sentitu duen, baina bere hizkeragatik barkamena eskatu dit, eta gaineratu du alabak esaten diola hizketan hasten denean enkantua galtzen duela. Ez dut jakin zer esan, eta enkantua oso erlatiboa dela esan diot. Izugarrizko barreak egin ditu: «Esango diot nire alabari!». Azkenean azalpena eman dit: kostaldekoa da emakumea eta itsasoko kontuetan lan egin du beti. Beti egon ei da gizonez inguratuta, eta askotan haiei agintzea tokatu omen zaio. Esan digu asko kosta zaiola kasu egin diezaioten eta azkenean haien moduan hitz egiten ikasi duela.
Ez dakit gizon guztiek horrela hitz egingo ote duten; ez dut uste. Ulertzen dut, hala ere, haien artean leku bat egiteko haiek gauzak egiteko duten formaz jabetu beharra dagoela kasu askotan. Agintzeko edo enpresa bat zuzentzeko ikasi ditugun moduak konkretuki gogorrak izan dira. Ez digute irakatsi goxotasunez gidatu daitekeenik. Gauza asko ditugu eraikitzeko oraindik gizon artean banatzen den mundu zatia beti ez dadin haien arrean banatu.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
