Herentziak

«Nahi duzuna lor dezakezu saiatzen bazara». «Zu ari zara zure etorkizuna eraikitzen». «Baikorra bazara, nahi duzun lekura iritsiko zara». Gu umeak ginenean eskolako karpetetan agertzen ziren halako titularrak, baina orain leku guztietan ikusten ditut: sare sozialetan,telebistako iragarkietan, ekitaldi politikoetan... Nik ere pentsatzen dut norbere ametsei jarraitu egin behar zaiela, baina kontziente naiz ezin dugula nahi dugun guztia lortu. Askotan, geure mugek jartzen digute galga, baina beste askotan bizi dugun inguruak. Guztiok ez ditugu nahi duguna izateko, egiteko, jateko edo gozatzeko aukera berak, eta gure arteko tartea ahaleginean bakarrik dagoela esatea ez da bakarrik gezurra: tranpa neoliberala da. Zahartzaroan pentsio duinik ez baduzu, hipoteka ez ordaintzearren etxetik bota bazaituzte, lan baldintza prekarioak badituzu... ez da ez zarelako gauzak ondo egiten ahalegindu. Andrea edo gizona izan, hemen jaio edo kanpotik etorri, hanka biak izan edo bat falta, entzun edo ez entzun, herrian edo hirian bizi... Asko aldatzen dira aukerak hemen, eta aukera berdintasunik ez badago, ahalegin hutsa ez da nahikoa ia ezertarako. Hemen ere pribilegio asko jasotzen diraodoleko herentzietatik zein sinbolikoetatik,eta horiek dira ametsen bidea erraztu edo zailtzen dutenak.