Noiz sortua: 2020-02-11 00:30:00

BIRA

Memoria txarra

Onintza Enbeita -

2020ko otsailak 11
Egunak aurrera doaz. Astelehen eguerdian Jaurlaritzaren zain jarraitzen dutenak nazkatuta daude itxaroteaz. Eguerdiko albistegiek esan dute zerbait esango duela Lehendakariak arratsaldean. Ez dut uste, hala ere, Zaldibarren gertatuaz gogoratuko denik. Pista guztien arabera, hauteskundeez baino ez du hitz egingo. Sare sozialetan, desagertutako langileen senideen txioak irakurri ditut. Gertatzen ari dena ikusita, edukazio handiz ari direla iruditzen zait. Ez dago egoera jasaterik. Zabortegia goitik behera erori da, langile bi harrapatu ditu azpian, bilaketa lanak gelditu egin behar izan dituzte amiantoa aurkitu dutelako, lurrak su hartu du, ura botatzerik ez da komeni luizien arriskua oraindik hor dagoelako, langile bien gorpuek han azpian jarraitzen dute nonbait eta inguruko herrietan nabarmena da erretzen ari denaren usaina. Eta Jaurlaritzak esateko duen bakarra da, hain justu ere oraintxe, egun hauetako batean, gehiago itxaron gabe, zabortegiari espedientea irekitzekotan zirela. Edo halako zerbait.

Hauteskunde urtea da aurten (gezur urtea). Baina guk ere erruaren zati handi bat badugu. Datorren hilerako ahaztu egingo zaigu Zaldibarren gertatu dena, eta botoa betikoei emango die jendeak; baina kasu, memoria txarra oso arriskutsua da.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna