HITZ ETZANAK

Zarata

Andoni Egaña -

2018ko urriak 12
Zarata da, abertzaleentzat Jesus Egiguren den antzeko zerbait: okerren ikusien artean ondoen ikusia. Zaratak ez du, esaterako, keak edo zaborrak duten makur osperik. Baina gero eta ozenago entzuten dira zaratak elkarbizitzarako sortzen dituen gorabeheren inguruko berriak.

Auzokoa egokituko zitzaion norbaiti zarata sortzaile izugarria, musika oso altu jartzen duelako edo taladroa erabiltzea gurutzegramak egitea baino gehiago gustatzen zaiolako; etxe-atarian taberna jarriko zioten beste norbaiti, eta kalera irteten diren erretzaileen marmarra sartuko zaio leihotik; herri-lanak tokatuko zitzaizkion beste norbaiti etxe-atarian eta pi-pi-pi entzuten duenero ez du jakingo iratzargailua ari zaion edo atzerantz doan garraio-tresnaren bat den...

Zaratak ez dirudi, gainera, erregulazio errazekoa. Ika-mika ugari sortzen du azkenaldian. Beste herritar batzuekin batera, Donostiako komentu bateko mojek hiriko Metroa egiteko burutzen ari diren zulatze-lanak direla eta sortzen den zarata eramaterik ez dagoela eta burutu duten sinadura bilketa izan da albiste azken egunotan. Ez dakigu Metro hori entzutetsua izatera helduko den noizbait, baina dagoeneko bada, behintzat, zaratatsu. Zerurako bidea isila da; infernurakoa, antza, ez hainbeste.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna