Hotz

Gogoa non eta zertan jarri baldintzatuta bizi gara. Premia sentitzen dugu, eta geuk bilatzen dugu informazioa. Eta eskertzen. Igaro berria dugun honen antzeko denborale sasoietan, etxetik autoz irten orduko jarriko dugu hurbileko irratiren bat ezusteak harrapa ez gaitzan. Seietako berrietan esango digute haizearen eraginez arbola bat erori dela eta bi noranzkoetan oztopatzen duela bidea Aian. Zazpietan, Balmaseda inguruan izan den istripu baten berri emango digute, eta auto-ilara luzeak sortu direla jakinaraziko. Zortzietan, Elgoibar eta Mendaro artean auto bat errepidetik irten dela eta...

Irudika dezagun orain zer-nolakoak liratekeen gure pentsamenduak trafikoari eskaintzen dioten eta diogun arreta, harat-honat dabiltzan etorkin taldeei eskainiko bagenie. Seietako berrietan kontatuko balute sei etorkin afrikar, lau Maliko eta bi Nigeriako, Irungo San Juan plazan daudela su txiki baten jiran. Zazpietan, beste etorkin talde batek Irungo liburutegian hartu duela babes. Zortzietan, San Juan Plazan zegoen etorkin taldeak Behobiako taberna ertz batera jo duela oinez...

Merezi genuke horrelako informazio erauntsi bat. Eta halere, ez dakit hotz-klase horren aurrean erreakzionatzen asmatuko genukeen.