HITZ ETZANAK

Adina

Andoni Egaña -

2019ko maiatzak 11
«Zahartzaroak beldurra ematen du; inoiz ez da bakarrik etortzen» esaldia utzi zigun Platonek. Zizeronek umore hobez hartu zuen kontua eta Pernandoren egia bat bota: «Luzaroan zahar izan nahi baduzu, gaztetatik hasi zahartzen». Rouchefoucauldek erantzun zion mende batzuen tartearekin: «Zaharrek aholku onak ematen dituzte, etsenplu txarrak emateko gai ez direlako jada». Eta Pablo Picassok oso bere erara eman zuen epaia: «Gazte izaten hirurogei urterekin hasten da pertsona...».

Atzo berripaper honek erreportaje bat zekarren, Arantxa Iraolarena, zahar etxeetako langileen mobilizazio eta protestak abiapuntu zituena. Hainbat konturen artean, daramaten lan erritmo handia aipatzen zuten eragozpen gisara zentro horietako langileek. Jendea lanerako ezinduta geratzen omen da erretiroa heldu baino lehen. Egoitzaren batean inor ez omen da erretirora iritsi. 50etik 60 urtera bitarteko adin tarte hori omen da kritikoa. Lanerako ezintasuna, gaixo agiri bat bestearekin katigatzea...

Filosofo, intelektual eta artistek zahartzaroari buruzko nahi hainbat esaldi distiratsu utzi digute mendeetan zehar. Mundua aldatu egin da, eta hemendik urte batzuetara zaharren zaintzak dakarren zahartzeari buruzkoak izango dira esaldirik gehienak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna