Albistea entzun

Telesailak

(Segurtasun) kameren biktima

Apple TV Plusek Erresuma Batuko 'Suspicion' estreinatu du, zortzi ataleko thrillerra. Uma Thurman aktore ezaguna da protagonistetako bat; Noah Emmerich aktoreak ere parte hartzen du Rob Williamsen telesailean
APPLE TV PLUS Tamaina handiagoan ikusi

Mikel Yarza Artola -

2022ko otsailak 12

Hotel bateko korridorea. Nerabe bat bere logelako atea irekitzen ari da. Bat-batean, lau pertsona maskaradunek inguratu dute, Erresuma Batuko errege familiako kideen maskarak daramatzate soinean. Nerabea kolpatu, konorterik gabe utzi, eta bidaia maleta batean sartu dute. Hoteleko kamerek bahiketa erregistratu dute, eta bideoa berehala zabaldu da sare sozialetan.

Tentsio gorena da nagusi Suspicion telesailaren lehen uneetan, eta ikusleentzat aperitibo aparta da; izan ere, thriller sendo baten atarian daude, generoko kode guztiak menperatzen dituen proposamen klasiko baten aurrean. Hoteletik nazioarteko puntu seinalatuetara igarotzen da istorioa. Londres, Oxford, Belfast, New York... polizia operazio bat abiatu dute hiri horietan, ustezko bahitzaileak atxilotzeko. Eta, berriz ere, kamerak zelatan. Helikopteroetan, taxietan, bankuko kutxazainetan... toki horietan guztietan daude kamerak eta protagonisten urrats bakoitza erregistratzeaz arduratzen dira. Zuzendariek gizarte kontrolaren sentipen hori indartu nahi izan dute, ezkutuko filmaketa kutsua duten irudien bidez.

Txanponaren beste aldean Uma Thurman aktore entzutetsuaren pertsonaia. Thurman ezagun egin zen Quentin Tarantinoren Pulp Fiction eta Kill Bill klasiko garaikideetan eta, kasu honetan, hedabideen magnate estatubatuar baten rola jokatu du. Haren semea da hotelean bahitu dutena, eta magnatea poliziarekin ezkutuko itunak antolatzen ari da, gertakari horrek ahalik eta gutxiena zipriztindu dezan, pertsonalki zein profesionalki. Polizia taldeko buru, pantaila txikiko beste aurpegi ezagunetako bat: Noah Emmerich (The Americans, The Walking Dead). Telesaila krisi betean abiatzen da, haren taupada biziak neurtzen ditu musika itogarriak, baina ikusleak ez daki zehatz-mehatz zer gertatzen ari den, eta hori da, hain justu, kontakizuna erakargarri egiten duena.

Irudien segida bizkorrak iradoki dezake lehen atalean gauza mordoa gertatzen ari dela, kasik Steven Soderberghen Ocean's trilogia ezagunean bezala. Baina, egiazki, gidoiak ez du ia garapen narratiborik, forma da istorioaren gidari, eta hori lorpen esanguratsu bat da. Hautu horrek, ordea, badu arriskurik. Azelerazio biziaren ostean, telesailak balazta sakatzen du bigarren atalean, eta, aukeran, indar handiegiz. Une horretatik aurrera, polizia miaketak eta galdeketak nagusituko dira telesailean, pertsonaia susmagarrien pentsamoldea aletzea izango da kontakizunaren helburua, baina, behin thrillerra alboratuta, maldan behera amilduko da. Goizegi adierazi ditu lehen ahulezia zantzuak, eta horrek ikusle andana uxa litzake.

Suspicion telesailaren izenburuak dioen moduan, susmoa da haren kontzeptu nagusia. Ustezko bahitzaileak pertsona arruntak dira, ez kriminal profesionalak eta normaltasun horren atzean zer ezkutatuko, misterio hori argitzean datza sortzaileek proposatzen duten jokoak. Telesailak kontrol sistema berrien arriskuez ere hitz egiten du; izan ere, azken urteetan mundu zabaleko gobernuek eta enpresa pribatuek aurpegiaren bidezko identifikazio metodoak areagotu dituzte. Nor ote segurtasunaren biktima erreala?

'SUSPICION'
Sortzailea: Rob Williams.
Aktoreak: Uma Thurman, Noah Emmerich, Georgina Campbell, Kunal Nayyar, Elizabeth Henstridge.
Herrialdea: Erresuma Batua. Urtea: 2022.
Non ikusi: Apple TV Plus.
Atal bakoitzaren iraupena: 45 minutu.
Generoa: Thrillerra.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

 ©JAIZKI FONTANEDA/ FOKU

«Ez da gaztetxearen inguruko film soil bat»

Amaia Jimenez Larrea

'Mari. Isilik nahi gaituztenan' Oñatiko Antixena gaztetxearen hamargarren urteurrenaren harira sortutako film bat da, fikziozkoa. Datorren astean estreinatuko da, Oñatin eta Durangoko Azokan.
Hilabete honetan bi aldiz agertu da Belharra, Donibane Lohizune parean. Europako uhinik handiena da. Matt Etxebarne ageri da argazkian, foil taula <em>hegalaria</em> lagun. ©FRANCK LAPUYADE

Belharra: hogei urteko mugarria

Ainize Madariga

Hogei urte bete dira Donibane Lohizuneko Belharra uhin erraldoiaren gainean surf egin zutela lehen aldikoz. Axi Muniainek arraunean ere igan zuen lehentze, 2013. urtean. Gero eta haboro dira ausartzen direnak orain: Matt Etxebarne da haietako bat. Baina denek oroitarazi dute lanjer handia.

 ©MARISOL RAMIREZ / FOKU

«Hemengo irrati batzuk hasiak dira jolasten adimen artifizialarekin»

Urtzi Urkizu

Adimen artifizialarekin narrazioak sortu, eta horiek 'Zero eta bat' podcastera eramaten ditu Erezumak. Gaur sareratuko du hirugarren atala. «Esperimentatzen jarraituko dut».

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Hitzen, ekintzen eta errimen eztanda. Herri bat BERRIAren kulturaren plazan. Baliatu udazkenean BERRIAlagun egiteko eskaintza.