Albistea entzun
Emakumeen aurkako indarkeriari ez
Emakumeen aurkako indarkeriari ez

BI TARTE

Trazu bat

MARIÑE ARBEO ASTIGARRAGA Tamaina handiagoan ikusi

Nerea Ibarzabal Salegi, Mariñe Arbeo Astigarraga - Txakur gorria

2022ko apirilak 10

Korronteek biratzen dute mundua. Joan-etorriek, joan-jinek, sigi-sagek; hara-hona, firin-faran, firi-firi dabilen haizeak. Borraskak datoz iparraldetik, antizikloiak hegoaldetik, gezi urdin eta gorriak tentsioa sortzeko eta askatzeko. Edozer marraz daiteke mapetan: itsasoko mareen norabidea, arrain sarden edo plastikozko poltsen mugimendua. Usoen zein pertsonen migrazioak. Bidaia hautatuak eta bidaia behartuak. Ibilbide seguruak eta arriskutsuak.

Inportazioen eta esportazioen mapak egiten dira. Kaxaz betetako kamioiz betetako porlanezko arteriak, hegazkinez jositako aire masak. Hegotik iparrera datorren koltana eta iparretik hegora doan arroz paketea bidean gurutzatuko dira eguneko orduren batean, eta pentsatuko dute «zer elikatzera goaz?».

Hor daude ur korronteak eta ibaiak ere, eta bakoitzak bere izena eta garrantzi kulturala du, elikadurarentzat, kantuentzat, kondairentzat edo tragedientzat.

Droga kargamentuen mundu mailako ibilguak ere traza ditzakegu, baita arma kargamentuenak ere. Nondik nora doaz, eta zer itzuliko da trukean? Munduko korronte guztiak gainjarriko bagenitu une batez, zein patroi azaleratuko litzateke? Estatistiken aztergaia edozein izanda ere, ez al zaigu mapa beti kolore berdintsukoa aterako? Zenbat eta iparrerago, orduan eta berdeago. Gorri ilunagoa, zenbat eta hegorago.

Eta nolakoa da Europa ez den beste kontinente bat erdigunean kokatzen duen mapa? Nolakoak lirateke mendebaldeko estatuen mugak noizbait kolonizatu izan balituzte?

Edozeren mapak egin daitezke: hizkuntzen erabilerarenak, populazioaren hazkundearenak, non aukeratzen den oliba olioa kozinatzeko eta non gurina, non dagoen hartz batek eraso eginda hiltzeko aukera gehien, non koko bat buru gainera erorita akabatzekoa.

Korronte eta mapa posible horiek guztiek zeharkatzen duten lur zati honetan beste trazu bat osatu da gaur, 22.ez. Korronte koloretsu bat, hitzezkoa eta hankazkoa, planetaren eskalara ekarrita ikusi ere egingo ez litzatekeena, baina etengabeko higiduran egon dena hamaika egunez, eta halaxe jarraituko duena AEK-ko irakasle eta ikasle bakoitzaren joan-etorriekin, eragile kultural, sozial eta euskaltzale guztien ekimen bakoitzarekin. Korronte guztiak izendatzeko hizkuntza bat, erronka zahar eta berriei aurre egiteko hiztegi bat, isobara denen azpitik, errekasto denen gainetik, fluxu guztiekin nahastean. Mugimendu bat, gelditasunaren kontra.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Gaiak

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...