Albistea entzun

Koronabirusa. Begoña Pedrosa. Huheziko dekanoa

«Elkarlana ezinbestekoa da irtenbideak bilatzeko»

Eskolarako itzulera inflexio puntua dela azaldu du Pedrosak, eta gizarteak etorkizunerako ereduei begira jarri behar duela. Haren ustez, pandemiak erakutsiko du badagoela aukera bestela jarduteko.
JOSU TXINTXURRETA Tamaina handiagoan ikusi

Aloña Beraza Peña -

2020ko irailak 2

Ikasturte berriari begira, aldaketak aurreikusteko unea dela uste du Begoña Pedrosa Huhezi Humanitate eta Hezkuntza Zientzien Fakultateko dekanoak (Areatza, Bizkaia, 1975). Hutsegiteetatik ikasteko eta beste eredu batzuk aintzat hartzeko une aproposa dela azpimarratu du.

Nolakoa izango da eskolara itzultzea?

Aurtengo ikasturtea zaila izango da. Gogorra izan daiteke, baina erantzukizunez jokatu behar dugu denok. Administraziotik hainbat jokaleku diseinatu dira, eta ikastetxe askotan planteamendu berritzaileak ari dira aurreikusten. Osasunaren ikuspegitik ez dakigu zer etorriko den, eta gauzak egun batetik bestera aldatzen dira. Aldiz, badago aldatuko ez den zerbait: etorkizunera begira gauzak beste modu batean prestatu behar ditugu. Administrazioa, zentroak eta familiak horretara begira jarri behar dira. Egoerari ahalik eta hoberena erantzuteko, ikusi behar dugu zein aukera dugun esku artean umeen benetako zaintza bermatzeko. Hor jarri behar dugu begirada.

Nola landu daiteke hori?

Zentro bakoitzean egoera ezberdinak aztertu behar dira. Presentzialtasunera itzultzeko, administraziotik irizpide orokorrak esleitzea ezinbestekoa da, baina ikastetxe bakoitzean, beharren ara- bera, ezberdin aplikatuko dira espazioak, ordutegiak eta ikasle-irakasle prozesuen antolaketa. Aurrez aurreko eskoletara joaten saiatu behar gara, baina ezin dugu pandemia ahaztu. Eredu presentziala lehenetsi behar da, baina muturreko egoera batera hurbilduz gero, aurreikusi behar da etapa batzuetan, agian, telelana egin beharko dela. Ez dugu halakorik nahi, baina gerta daiteke, eta prest egon behar dugu. Eredu mistoak aurreikusi behar dira, eta pentsatu beharko genuke nolako hezkuntza eredua nahi dugun ume guztientzat kalitatezko prozesuak ziurtatzeko. Hausnartzeko abagunea ere bada, mistorako gabeziak ditugulako. Prestakuntza gehiago bideratu behar da zentroetara.

Zailtasunik aurreikusten duzu?

Noski. Batetik, kontziliazioa dugu, ezin dugu beste alde batera begiratu. Sormena erabili behar dugu. Irtenbideak eta aukerak bilatzeko ezinbestekoa izango da ad ministrazio, enpresa, erakunde eta norbanako guztiok elkarlanean jardutea, elkarren beharra dugulako. Ikuspegi integraletik eta erantzun eklektikoetatik eman behar diogu irtenbidea egoerari.

Bestalde, bereziki zaindu behar ditugu ikasleen harrera pertsonala eta arreta emozionala. Aniztasun handia egongo da, haur bakoitza bere motxilarekin itzuliko delako eskolara, baina familiekin batera eta zentroetan lan berezia eginda artatu behar da arreta emozional hori. Gainera, ikasturtea eredu presentzialean hasten badugu, lehen asteetan zaintza berezia egin beharko da ikasleekin, akademikoki eta emozionalki, maila guztietan. Ondo prestatu behar da zorua, konfinamendu egoerara itzuliz gero erantzun ona emateko. Haurrak eta gazteak prest egon behar dira egoera horretan berriro ere lan egin beharko balitz; iraila eta urria horretarako gakoak izango dira.

Helburu kolektiboa izan beharko luke itzulera lantzeak?

Hezkuntza bera helburu kolektiboa da. Administrazioak bere etxerako lanak egin beharko ditu, eta horretan dabil, baina denon parte hartzea eta konplizitatea beharrezkoa da; interakzioak bultzatu behar ditugu. Erabaki asko tokian toki hartuko dira, administrazioaren laguntzarekin eta aholkularitzarekin, baina leku bakoitzeko konplexutasunari erantzun beharko zaio. Hezkuntza komunitatea hor dago, eta oso modu kolektiboan eta kohesionatuan hartu beharko dira erabakiak. Gizarte moduan jokatu beharko dugu, eta horregatik diot familien rola erabakigarria izango dela.

Zer gertatzen da baliabiderik ez duten ikasleekin?

Egoera larri batetik gatoz. Itxialditik gauza asko ikasi ditugu hezkuntzako etapa guztietan. Zentroak familien beharrak asetzeko egon direla esango nuke, eta erantzun dutela. Itzuleran ziurtatu beharko genuke ikasturtea hasi aurretik minimo horiek bermatuta daudela, ezin du aukera bat izan. Baliabide gehiago jartzea beharrezkoa da, baina baliabide gehiago jarrita ez da dena konpontzen; indarra jarri behar dugu ikasketa espazio berritzaileak diseinatzen, antolaketa on batekin eta zentzua erabilita. Formula berriak aplikatu behar dira hezkuntza prozesu berriak diseinatzeko, eta uste dut dibertsifikazioa ikaskuntza prozesura ekarri behar dugula derrigor, baliabideei eta espazioei dagokienez, esaterako: jantokiak eta gimnasioak erabili behar badira egoera honi aurre egiteko, erabili beharko ditugu. Kanpo espazioak ere egokitu daitezke, aisialdirako eremuak, baita herrietan ere. Sormen handia beharko dugu, baina oso aukera interesgarriak sor daitezke. Orain da benetako hezkuntza komunitarioa bultzatzeko unea.

Hutsetatik ikasteko unea da?

Momentu zailetatik gatoz, baina aurrera begiratu behar dugu: pandemiak erakutsi behar digu gauzak beste modu batean egiteko aukera ere badagoela. Aukerak aztertu behar ditugu: zailtasunak eta hutsuneak ikusteko joera ikaragarria izaten dugu, eta, jakina, osasuna funtsezkoa da, baina gauzak bestela egiteko eszenatoki horiei ere begiratu behar diegu; gogoan izan behar dugu gazteak eta haurrak direla herriaren etorkizuna. Zaila izango da, lan ikaragarria egin beharko da, baina buruko eskemak aldatu behar ditugu, eta denon esku dago hori. Horretarako, noski, prestakuntza beharko dute irakasleek, baina ezinbestekoa da epe laburrean zentroetan jokaleku berriak aurreikustea.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Irizpidea duzulako. Giroan zabiltzalako.

Zuk badakizulako.

Albiste gehiago

Berra zaharren egoitzako bi erabiltzaile solasean. ©GORKA RUBIO / FOKU

2020ko udatik izandako kasu kopururik apalena zenbatu dute Hegoaldean

Uxue Rey Gorraiz

Beste 79 kutsatu atzeman dituzte. Biztanleen %80k baino gehiagok dute dosiren bat, eta hasiak dira egoiliarrak hirugarren aldiz ziztatzen
Hendaiako (Lapurdi) atxikitze zentroa, artxiboko irudi batean. ©SYLVAIN SENCRISTO

Hendaiako atxikitze zentroa hustu dute, sute batengatik

Iñaki Agirre Perez

Bi lagun eraman dituzte ospitalera, bat egoera larrian. Cimadek sutearen kudeaketan izan diren arduragabekeriak salatu ditu
Ertzaintza Kukutzako teilatuan zeuden gazteak atxilotzen, 2011ko irailaren 21ean. ©Jon Hernaez / Foku

Hamarkada bat Kukutza III hustu zutenetik

Paulo Ostolaza

Ertzaintzak indarrez hustu zuen Bilboko gaztetxe handiena zena: 55 lagun atxilotu zituen, 63 auzipetu, eta ehundik gora zauritu.

Indarkeria matxistaren aurkako manifestazio bat, Gasteizen, artxiboko irudian ©jaizki fontaneda / foku

Gasteizen gizon bat atxilotu dute bikotekideari eraso egiteagatik

Irati Urdalleta Lete

Emakumeak zauriak zituen eskuan eta lepoan. 29 urteko beste gizon bat ere atxilotu dute Gasteizen, emakume bati ukituak egitea egotzita.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Egin BERRIAlaguna

Irizpidea duzulako. Giroan zabiltzalako.

Zuk badakizulako.

Egin BERRIAlaguna