Inkestak

Aitorpen bat. Oso gogoko ditut inkestak, nik haietan parte hartuta ala ez. Miresgarriak iruditzen zaizkit. Aukera dudan guztietan erantzuten dut inkesta bat. Munduan eragin dezakedalako ilusioa gazte mantentzeko bide errazena iruditzen zait. Tira, egunkari batean zutabe bat edukitzeak ere indartzen dit sentsazioa, baina ezer ez da inkesta batean parte hartzea bezain erraza eta kitzikagarria.

Nire amets betegabea da inoiz deituko didatela telefonoz eta ez dela konpainiaz (edozeinetaz) aldatzeko gonbidapen interesduna izanen, baizik eta hurrengo hauteskundeetan botoa nori emanen diodan galdetzekoa. Oraindik ez dut argi egiarekin ala ez erantzunen nukeen (ametsetan bide onena zein den nahasgarria izaten da), egiaosteko garaiotan ez dagoelako jakiterik zer den eraginkorragoa. Modu berean leitzen ditugu argitaratzen diren inkestak, eta egunotan asko argitaratzen dira, emaitza sotilki kontraesankorrekin, aldaketa funtsean posiblea ez dela sinetsarazteko asmoz diseinatuak diruditenak.

Inkestetan gehien maite dudana da denok aurkitu dezakegula bertan zoriontsu izateko moduko bat, ai, non gure proiektu guztiak ausaz beteko ziren, non gizarte justuago bateranzko urrats txiki baina erabakigarria ematen ariko ginen.