JIRA
Satelitea
Nonbait irakurri dut lehen euskal satelitea espazioratu dutela Cañaveral lurmuturreko base estatubatuarretik. Euskalduna (edo euskotarra) EHUren Leioako campus teknologikoan garatu dutelako. Bereizmen handiko irudiak hartu ahal izanen ditu, printzipioz edo aitortu dutenaren arabera, nekazaritzako edo ingurugiroko planifikaziorako eta (honek pizten du nigan irudikortasun handiagoa) babes zibilerako. Notizian ez da esaten —baina, ez dakit, hala izan behar duela pentsatu dut— Euskal Herriaren gainean josiko ote duen begi zolia. Horrek ere eginen luke satelitea notiziaren goiburuak adierazi bezain euskalduna (edo euskotarra).
Gauza batek, baina, piztu du batez ere nire mesfidantza. Urdaneta izena jarri diote sateliteari. Euskarazko izen bat, eta ez ingelesezko hitzen mordoilo nahasi bat; ez, esaterako, Basque Security Satellite edo gisako zerbait. Berehala susmatu dut garai bateko konkistatzaile edo esploratzaile bat izanen zela. Notiziak berretsi dit Andres Urdaneta ordiziarrak Filipinak «deskubritu» zituela. Izena eman zion bertatik Ameriketarako bideari ere. Baina, nik uste, satelitea haren izenaz bataiatzeko arrazoi handiagoa izan daiteke Urdaneta kosmografo ere izatea.
Izen egokiegia gurea izateko.
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
